Адыгеим иеджапIэхэм ащагъэпсыгъэ мэз хъызмэтшIапIэхэм яапэрэ зэфэс мы тхьамафэм Мыекъопэ районым ит псэупIэу Краснооктябрьскэм игурыт еджапIэу N 2-м щыкIуагъ. Ащ кIэщакIо фэхъугъэх АР-м мэзхэмкIэ и ГъэIорышIапIэрэ АР-м гъэсэныгъэмрэ шIэныгъэмрэкIэ и Министерствэрэ.

Республикэм иэколог ныбжьыкIэхэр, кIэлэегъаджэхэр, мэз хъызмэтым илъэ­сыбэ езытыгъэ специалистхэр зэзыпхыгъэ Iофтхьабзэм къыдыхэлъытагъэу еджапIэхэм ямэз хъызмэтшIапIэхэр яIофшIакIэкIэ зэдэгощагъэх, 2024 — 2025-рэ илъэс еджэгъоу кIуагъэм ашIагъэр зэфахьысыжьыгъ, щыкIагъэхэм, тапэкIэ анаIэ зытырагъэтын фаехэм атегущыIагъэх.
Зэфэсыр къызэрэзэIуахырэм фэ­— гъэ­хьыгъэ Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, Къыблэ Федеральнэ шъолъырым мэз хъызмэтымкIэ и Департамент ипащэ игуадзэу Наталья Сеидовар, АР-м гъэсэныгъэмрэ шIэны­гъэмрэкIэ иминистрэу Евгений Лебедевыр, АР-м мэзхэмкIэ и ГъэIорышIапIэ ипащэу Былымыхьэ Рэщыдэ, нэмыкI­хэр.
АР-м и ЛIышъхьэу КъумпIыл Мурат, шъолъыр Парламентым идепутатхэм ацIэкIэ зэфэсым хэлажьэхэрэм шIуфэс къарихыгъ Владимир Нарожнэм.

«Республикэм ичIыгухэм япроцент 40-р мэзхэм аубыты. Арышъ, ахэм якъызэтегъэнэн, мэз хъызмэтым зегъэу­шъомбгъугъэныр пшъэрылъ шъхьаIэу АР-м и ЛIышъхьэ къы­гъэу­цухэрэм ащыщ. Мы лъэныкъомкIэ ашIэрэри макIэп. ЕджапIэхэм ямэз хъызмэтшIапIэхэр зыщыIэхэр илъэс 50-м ехъугъ. КъыткIэхъу­хьэрэ лIэужхэр IофшIэным фэгъэ­сэгъэнхэм, чIыопсыр шIу ягъэлъэ­гъугъэным, ащ фэсакъынхэм фэпIугъэнхэм, мэз хъызмэтым изехьанкIэ шIэныгъэ ягъэгъотыгъэным алъэныкъокIэ ащ шIогъэшхо иI. Арышъ, ахэм ахэт мэз хъызмэтшIэкIо цIыкIухэм гъэхъагъэхэр ашIынхэу са­фэлъаIо, ягъэсакIомэ «тхьашъуе­гъэ­псэу» ясэIо», — къыIуагъ Парламентым и Тхьаматэ.
ЕджапIэхэм ямэз хъызмэтшIапIэхэр илъэсыбэ хъугъэу щыIэх нахь мышIэми, ащ фэдэ зэфэс апэрэу зэрэзэхащэрэр, яопыткIэ, яшIэныгъэхэмкIэ зэдэгощэнхэр, щыкIагъэхэр къыхагъэщынхэр, ахэм Iоф зэрадашIэщтыр зэдагъэнэфэныр, мы лъэныкъом непэ кIэу къыхэхьагъэхэр пхырыщыгъэ зэрэхъущтым зэдытегущы­Iэнхэр ащ пшъэрылъ шъхьаIэу зэриIэр къыхигъэщыгъ АР-м мэзхэмкIэ ГъэIорышIапIэм ипащэу Былымыхьэ Рэщыдэ къызэгущыIэм. КIэлэеджакIохэми, ахэм ягъэсакIохэми гухахъо хагъуатэу, шIуагъэ къыхьэу мэзхэм япхыгъэ Iофэу ашIэрэр лъагъэкIотэнэу, тапэкIи мыщ фэдэ зэ­фэсхэр зэхащэнхэу ар къафэлъэIуагъ.
Республикэм иеджапIэхэм мэз хъыз­мэтшIэпIи 8 ащагъэпсыгъ, ахэм кIэлэеджэкIуи 140-м ехъу япхыгъ. ЗэкIэ хъызмэтшIэпIэ цIыкIухэр зэфэсым къыщызэрэугъоигъагъэх, ау нэбгырэ 80-р ары хэлэжьагъэр.
Зэфэсым къыдыхэлъытэгъэ Iофтхьабзэхэр мэфитIурэ кIуагъэх. Зэпстэумэ апэу хъызмэтшIапIэхэм илъэс еджэгъоу кIуагъэм Iофэу ашIагъэр къызэфахьысыжьыгъ. Нэужым Курджыпс мэз хъыз­мэтшIапIэм инаучнэ-гъэсэныгъэ экологическэ стационар щыIагъэх. Ащ мэз культурэхэм, чъыг лъэпкъыкIэхэм якъэ­гъэкIын, машIохэм мэзыр зэращыухъу­мэгъэн фаем ащытегущыIагъэх.
ЯтIонэрэ мафэм «Мэзыр къызэдэтыухъумэн» зыфиIорэ проектым къыдыхэ­лъытагъэу мэз-парк чIыпIэу «Мэздахэм» санитарнэ Iофтхьабзэхэр щызэшIуахыгъэх, викторинэхэр щызэхащагъэх. Нэужым Краснооктябрьскэм дэт гурыт еджапIэу N 2-м нэпэеплъэу чъыг цIыкIухэр щагъэтIысхьагъэх.
Пстэумэ ауж Iофтхьабзэхэр зэрэкIуа­гъэхэр зэфахьысыжьыгъ, еджапIэхэм яхъызмэтшIэпIэ анахь хъупхъэхэр къыхагъэщыгъэх.
Хъут Нэфсэт.