Мыекъуапэ дэт гурыт еджапIэу N 6-м арт-объектэу щашIыгъэр бэмышIэу къызэIуахыгъ. Проектэу «Творческая перезагрузка школьных пространств «Окно в культуру» зыфиIорэм ар къыдыхэлъытагъ. ТекIоныгъэшхор къызыдахыгъэр илъэс 80 зэрэхъугъэм ыкIи хэгъэгум иухъумакIо и Илъэсэу мыгъэ зэрэщытым ар япхыгъ.

Ветераным кIэлэцIыкIум IаплI рищэкIэу арт-объектым ит. КIэлэеджакIоу Анна Кривко иэскизэу «Мы помним и гордимся» зыфиIорэм ар техыгъ. Сурэтым лIэшIэгъухэр зэрепхых, нахьыжъхэм лIыхъужъныгъэу зэрахьагъэр къыреIотыкIы, патриотическэ мэхьанэ хэлъ.
ЕджапIэмкIэ мыр ятIонэрэ арт-объект. 2024-рэ илъэсым адыгэ унагъом фэгъэ­хьыгъэу щагъэпсыгъагъ, ащ къыщегъэ­жьагъэу еджапIэр искусствэм нахь пэблагъэ хъугъэ.

Iофтхьабзэм хэлэжьагъэх Мыекъопэ къэлэ администрацием гъэсэныгъэмкIэ и ГъэIорышIапIэ, «Боевое братство» зыфиIорэ организациер, «Апэрэхэм я Движение» хэтхэр, кIэлэеджакIохэр, кIэлэегъаджэхэр. Джащ фэдэу эскизыр зие Анна Кривко ащ хэлэжьагъ, къэзэрэугъоигъэхэм гущыIэгъу афэхъугъ. ТекIоныгъэм фэгъэхьыгъэ орэдхэр, усэхэр къыщаIуагъэх, къэшъуагъэх.
Мысатыу акционер обществэу «Талантида» зыфиIорэм ипащэу Карен Каракьян сурэтшIынымкIэ зэнэкъокъум хэлэжьагъэхэу текIоныгъэ къыдэзыхыгъэхэм щытхъу тхылъхэр нэужым аритыгъэх
— Мы арт-объектыр блэкIыгъэмрэ непэрэ мафэмрэ ялъэмыдж. Тинахьыжъхэм лIыхъужъныгъэу зэрахьагъэр искусствэм ишIуагъэкIэ къыткIэхъухьэрэ лIэужхэм зэхятэгъашIэ, тызэрафэразэр къэтэгъэлъагъо. ЕджапIэр илъэситIу хъугъэу проектым хэлажьэ, мыщ фэдэ гухэлъхэр щыIэныгъэм щыпхырещых, — къыIуагъ Карен Каракьян.
Iофтхьабзэм къыдыхэлъытагъэу кIэлэеджакIохэм чебурашкэхэр ашIыгъэх, ахэр хэушъхьафыкIыгъэ дзэ операцием щыIэхэм шIушIэ IэпыIэгъум игъусэхэу афащэщтых.
Арт-объектхэм япхыгъэ проектыр «Талантидэм» щыIэныгъэм щыпхырещы. «Апэрэхэм я Движение» игрант IэпыIэгъу къафэхъу. 2025-рэ илъэсыр пштэмэ, Адыгеим ит гурыт еджэпIи 10-мэ ыкIи Краснодар краим ит зы еджапIэ квадрат метрэ 350-рэ хъурэ арт-объект 11 ащагъэпсыгъ.
Джащ фэдэу мы мафэхэм Адыгэкъалэ дэт гурыт еджапIэу N 2-м ыкIи Джэджэ районым дэт гурыт еджапIэу N 12-м арт-объектхэр къащызэIуахыгъэх.