Проектэу «ЛIыхъужъэу къэхъухэрэп» зыфиIорэм къыдыхэ­лъытагъэу АР-м и Лъэпкъ тхылъеджапIэ танкистым и Мафэ фэгъэхьыгъэ патриотическэ Iофтхьабзэ щыкIуагъ.

Ащ кIэщакIо фэхъугъэх тхылъеджапIэмрэ фондэу «Хэгъэгум иухъумакIохэр» зыфиIорэм ишъолъыр къутамэрэ. Iоф­тхьабзэм хэлэжьагъэх хэушъхьафыкIыгъэ дзэ операцием иветеранхэр ыкIи ныбжьыкIэхэр.
ЛIэужхэр зэзыпхырэ зэIукIэгъур къызэ­Iуахыгъ гум нэсырэ орэдэу «Экипаж машины боевой» зыфиIорэмкIэ. Хэгъэгум иухъумакIохэм афытиIэ лъытэныгъэр ыкIи шIэжьыр мы орэдым къыгъэнэфагъ. Джащ фэдэу мы мафэм Iофтхьабзэм чIыпIэ гъэнэфагъэ щиубытыгъ лекциеу «Гремя огнем, сверкая блеском стали..» зыцIэм.
Танкыдзэхэм ятарихъ, Хэгъэгу зэо­шхом илъэхъан ахэм ыкIи непэ тиухъу­макIохэм лIыгъэу зэрахьагъэр къизыIотыкIырэ тхылъ къэгъэлъэгъонэу тхылъеджапIэм иIофышIэу Александр Данильченкэм къыгъэхьазырыгъэм ашIогъэшIэгъонэу ныбжьыкIэхэр еплъыгъэх.

Патриотическэ Iофтхьабзэм анахьэу псэ хэт зышIыгъэр Iэшэ зэIуупIэныгъэхэм яветеранхэм ныбжьыкIэхэр занкIэу адэгущыIэнхэ амал зэряIагъэр ары. Танкистхэр зэрагъэхьазырхэрэм, экипажхэм язэкъотныгъэ имэхьанэ къафиIотагъ хэушъхьафыкIыгъэ дзэ операцием хэлэжьагъэу, запасым щыIэ подполковникэу Андрей Васнецовым. Ар Челябинскэ танковэ институтым щеджагъ. Илъэс зэ­кIэ­лъыкIохэм къулыкъоу ыхьыгъэр гъэшIэгъонэу студентхэм алъигъэIэсын ылъэ­кIыгъ.
Генерал-майорэу Александар Дорофеевыр ыкIи запасым щыIэ старшэ прапорщикэу Анатолий Жор­ник зэIукIэгъум хэлэжьагъэх. Танкыдзэхэм хэбзэшIоу ахэлъхэр, сыд фэдэрэ лъэхъани мэхьанэу яIэм мыхэри къытегущыIагъэх. Ахэм къыхагъэщыгъ ти­лIэуж нахьыжъхэм лIыхъужъныгъэу зэрахьагъэр, къэралыгъом ищынэгъончъагъэ гъэпытэгъэнымкIэ яшIуагъэу къакIорэр ныбжьыкIэхэм ашIэным пае дзэ зэфэшъхьафхэм ятарихъ щыгъозэнхэ зэрэфаер.
Патриотичекэ Iофтхьабзэм икIэухым шъолъыр фондым ипащэ игуадзэу Джарымэ Еленэ ветеранхэм рэзэныгъэ гущыIэхэр апигъохыгъэх. Ахэм IэпэIэсэныгъэу аIэкIэлъыр къыткIэхъухьэхэрэм алъагъэIэсынымкIэ, дзэ сэнэхьатхэм лъытэныгъэ афашIэу пIугъэнхэмкIэ мыщ фэдэ Iофтхьабзэхэм яшIуагъэ къызэ­рэкIорэр хигъэунэфыкIыгъ.
ЛIэужхэм язэдэгущыIэгъу лъыгъэкIотэгъэным, лIыхъужъныгъэм ишIэжь тикъэ­кIощт лъэхъанкIэ кIуачIэ къэзытырэ амалэу щытыным афэшI фондэу «Хэгъэ­гум иухъумакIохэм» зэпымыоу иIоф лъегъэкIуатэ.
Iэшъынэ
Сусан.