ЗэлъашIэрэ дзюдоистэу Евгений Погореловым ишIэжь фэгъэхьыгъэу дзюдомкIэ Урысые зэнэкъокъухэр къалэу Волгоград щыкIуагъэх. Мыщ фэдэ зэнэкъокъухэр я 20-у зэхащэх.

Мызыгъэгум рагъэкIокIыгъэ зэнэкъо­къухэм федеральнэ шъолъыри 8-мэ ыкIи къэралыгъом исубъект 24-мэ къарыкIыгъэ спортсмени 197-рэ ахэлэжьагъ. Анахьыбэу зилIыкIохэр ащ къэзыгъэкIуа­гъэхэр Къыблэ федеральнэ шъолъырыр ары — спортсмени 112-рэ.
Зыныбжь икъугъэ спортсменхэр медаль комплект 14-мэ афэбэнагъэх, къа­щэчырэм елъытыгъэу купи 8-у зэтеутыгъэхэу. Къыхэгъэщыгъэн фае, чIыпIэхэм, медальхэм язакъоп спортсменхэр зы­фэбэнагъэхэр, текIоныгъэр къыдэзыхыхэрэм ащыщхэм «спортымкIэ мастер» зыфаIорэ цIэр къафагъэшъошэнэу щытыгъ, ары а зэнэкъокъухэм «мастерскэкIэ» зыкIяджэхэрэр.
Адыгэ Республикэм идзюдоист нэбгырэ 11 зэнэкъокъухэм ахэлэжьагъ. Ахэм ащыщ нэбгыритIум хагъэунэфыкIырэ чIыпIэхэр аубытыгъ, медальхэр къахьыгъ. Килограмм 81-м нэс къэзыщэчыхэрэм якуп Еутых Рэмэзан ятIонэрэ чIыпIэр къыщыдихыгъ, килограмм 66-м нэс къэзыщэчыхэрэм азыфагу щыкIогъэ зэнэкъокъухэм ящэнэрэ чIыпIэр щиубытыгъ Мерэм Дамир. Тидзюдоистхэу Ардан Зауррэ (килограмм 90-рэ) Мэлыщ Аскэррэ (килограмми 100) ятфэнэрэ хъугъэх.