АР-м и Сурэт къэгъэлъэгъуапIэ Хэгъэгу зэошхом ТекIоныгъэр къызыщыдахыгъэр илъэс 80 ыкIи искусствэхэмкIэ Адыгэ республикэ колледжэу Тхьабысымэ Умарэ ыцIэ зыхьырэр зызэхащагъэр илъэс 65-рэ зэрэхъугъэхэм япхыгъэу мы колледжым щеджэхэрэм ядиплом IофшIэгъэ анахь дэгъуи 100-м ехъумэ якъэгъэлъэгъон мы мафэхэм къыщызэIуахыгъ.

Колледжым иотделениитIу – «Живопись» ыкIи «Декоративно-прикладное искусство и народные промыслы» зыфиIохэрэм ястудент анахь чанхэм ­аIапэ къыпыкIыгъэ IофшIагъэхэу 2024 – 2025-рэ илъэсхэм ашIыгъэхэр экспозициехэм ахэхьагъэх.
Произведениехэр живописым, графикэм ыкIи декоративно-прикладной искусствэм яшъуашэхэм арылъых, ахэр нэм зэрэфэплъых. Мыщ дэжьым къыхэгъэщыгъэн фаер тапэкIэ Адыгэ музыкальнэ училищыщтыгъэу джы колледж хъугъэм, Адыгеим иныбжьыкIэхэр искусствэм фэщэгъэнхэмкIэ, культурэ хьэсэшхом хэуцонхэмкIэ илъэс 65-рэ хъугъэу Iофышхо зэрилэжьырэр ары. Колледжым мы иотделениитIу яIэ зыхъу­гъэр бэшIагъэп – 1991-рэ илъэсыр ары. Ащ емылъытыгъэу, шъолъырым ииджырэ искусствэ яIахь гъэнэфагъэ халъхьагъ, хахъо фашIыгъ.

Щэч хэлъэп, искусствэхэмкIэ Адыгэ республикэ колледжым ипащэу Куфэнэ Щамсэт къызэриIуагъэу, специалист дэгъухэм рагъэджэрэ ныбжьыкIэхэр шIэныгъакIэхэм, IэпэIэсэныгъэм, шIум афащэгъэнхэр, ахэлъ сэнаущыгъэр лъэ­ныкъуабэкIэ къызэIуахыныр афызэшIокIы, ежь егъэджакIохэми мы лъэныкъохэмкIэ сэнаущыгъи, творческэ кIочIэ икъуи ахэлъ.
Уегупшысэмэ, 1991-рэ илъэсэу мы отделениитIур зыщызэхащагъэр къызэрыкIуагъэп: хэгъэгушхоу СССР-р зэбгырытэкъугъагъ, зэчый зыхэлъ ­еджакIохэр, ыпэкIэ фэдэу, къэлэшхохэу Москва, Ленинград къыщеджэнхэу агъэ­кIожьыщтыгъэхэп; джащыгъум, ежь республикэм иIэ амалым тетэу, искусствэм ишъэфхэм ныбжьыкIэу ащ фэщагъэхэр зыщырагъэджэщт отделениитIур къызэрэзэIуахыгъагъэр къэгущыIагъэхэу Iофым щыгъуазэхэм къаIотагъ. Ягухэлъ къадэхъугъ: искусствэхэмкIэ Адыгэ рес­публикэ колледжым ныбжьыкIэхэм шIэныгъэхэр ыкIи шIыкIэ-амалхэр языгъэгъотын зылъэкIыщт IофышIэхэри къэнэфагъэх, Iофыр лъыкIотагъ. Джы мары колледжым щеджэхэрэм ыкIи ащ къычIэкIыхэрэм яIэпэщысэхэр, зыр-зым нахь дахэу, гъэшIэгъонхэу, сурэт е Iэпэщысэ пэпчъ гупшысэкIэ къыуатэу, искусствэ шэпхъэ лъагэ зэряIэр ­нэрылъэгъу къыпфэхъу.
СурэтшIыгъэхэр зэфэшъхьафых шъуа­шэу яIэмкIи зыхэшIыкIыгъэмкIи. Ахэр зэкIэ – тхьапэм тет сурэтхэри, дышъэ­идэр зыщыгъэфедагъэхэри, портрет инхэри IэпэIэсэныгъэ зыхэлъ ныбжьыкIэхэм яIофшIагъэх. Ахэм агуи, апси искусствэм зэрэфытегъэпсыхьагъэхэр къэгъэлъэгъоным къеушыхьаты.

Мамырыкъо Нуриет.