Урысые зэнэкъокъоу «Илъэсым иунагъу» зыфиIорэм ишъолъыр, ифедеральнэ чэзыухэм ащатекIуагъэхэр республикэм и Правительствэ зычIэт унэм щагъэшIуагъэх.

Адыгэ Республикэм и ЛIышъхьэу КъумпIыл Мурат зэIукIэм хэлажьэхэрэм шIуфэс фабэ къарихыгъ. Волошин зэшъхьэгъусэхэу Василийрэ Светланэрэ яунагъоу Джэджэ районымкIэ псэупIэу Сергиевскэм щыпсэурэм, лъэныкъоу «Бын-унэгъо Iужъу» зыфиIорэмкIэ зэнэ­къокъум и Урысые чэзыу щатекIуагъэм республикэм ипащэ шъхьафэу фэгу­шIуагъ.
«Шъощ фэдэхэу унэгъо пытэ, унэгъо зэгурыIожь зиIэхэм лъытэныгъэшхо афэпшIынэу атефэ. Шъуиунэгъо насып шъор-шъорэу зэрэжъугъэпсырэм имызакъоу, обществэм ищыIэныгъи чанэу шъухэлажьэ, унэгъо кIоцIым илъын фэе хабзэхэм язехьанкIэ щысэтехыпIэ шъуа­фэхъу. АщкIэ неущырэ мафэм шъуиIахьышхо хэшъошIыхьэ», — къыIуагъ КъумпIыл Мурат.
Шъугу къэтэгъэкIыжьы Урысые зэнэ­къо­къоу «Илъэсым иунагъу» зыфиIорэр мыгъэ я 10-у зэрэзэхащэрэр. Проектым изэхэщакIохэм ащыщ Урысыем IофшIэнымрэ социальнэ ухъумэнымрэкIэ и Министерствэрэ щыIэныгъэм чIыпIэ къин ригъэуцогъэ кIэлэцIыкIухэм IэпыIэгъу афэхъугъэнымкIэ Фондымрэ.
Адыгеим щыщ унэгъо 50 зэнэкъокъум илъэныкъуи 6-мэ ахэлэжьагъ. Шъолъыр чэзыум щатекIуагъэх Марков Николайрэ Иринэрэ яунагъо (Мыекъуапэ), Зыхьэ Зурабрэ Фатимэрэ яунагъо (Кощхьэблэ район), Волошин Василийрэ Светланэрэ яунагъо (Джэджэ район), Блащинский Игорьрэ Анастасиерэ яунагъо (Теуцожь район), Хьакомэ Бислъанрэ Симэрэ яунагъо (Адыгэкъал), Аулъэ Даутэрэ Ларисэрэ (Шэуджэн район) яунагъо.

Мы илъэсым ишышъхьэIу мазэ зэнэ­къо­къум изэхэщэкIо комитет зэхэсы­гъоу иIагъэм шъолъыр чэзыухэм текIоныгъэ къащыдэзыхыгъэ унэгъо 460-мэ ятхылъхэм щахэплъагъэх. Лъэныкъоу «Унэгъо Iужъу» зыфиIорэм щатекIуагъэр Адыгеим щыщ Волошинхэм яунагъоу сабыи 4 зыщапIурэр ары.
ЗэIукIэм хэлэжьагъэхэм Iофэу зыпылъхэм, яунэгъо кIоцI хабзэу илъхэм, якIэлэцIыкIухэмрэ япхъорэлъфхэмрэ гъэхъагъэу ашIыгъэхэм афэгъэхьыгъэу къаIотагъ. Зэнэкъокъухэм ахэлэжьагъэ­хэм мэкъу-мэщым, социальнэ лъэны­къом Iоф ащашIэ, дзэм къулыкъу щахьы, шIушIэн Iофым, предпринимательствэм апылъых, кIэлэегъаджэхэри ахэтых.
КъумпIыл Мурат зэIукIэм зэрэщыхигъэунэфыкIыгъэмкIэ, унагъохэм IэпыIэгъу ягъэгъотыгъэным лъэшэу Урысыем анаIэ щытырагъэты. АщкIэ яшIуагъэ къэкIо Президентыр кIэщакIо зыфэхъугъэ Iофтхьабзэхэм, къэралыгъо программэхэм, лъэпкъ проектхэм. Республикэм ипащэ зэIукIэм хэлажьэхэрэм анаIэ тыраригъэдзагъ сабыибэ зэрыс унагъо­хэм, хэушъхьафыкIыгъэ дзэ операцием хэлажьэхэрэм яунагъохэм арысхэм IэпыIэгъоу Адыгеим щарагъэгъотырэм ренэу зэрэхагъахъорэм.
«Тикъалэхэм, къуаджэхэм щынэгъон­чъэу ащыпсэунхэмкIэ, унагъохэр пытэнхэмкIэ, шIулъэгъумрэ лъытэныгъэмрэ уасэу афашIырэм зыкъегъэIэтыгъэ­нымкIэ тапэкIи тфэлъэкIырэр зэкIэ тшIэщт», — къыIуагъ КъумпIыл Мурат.
ЗэIукIэм икIэухым Адыгеим и ЛIышъхьэ зэнэкъокъум щатекIуагъэхэм дипломхэр аритыжьыгъэх, псауныгъэ пытэ яIэнэу, шIоу щыIэр зэкIэ къадэхъунэу афэлъэIуагъ. Iофтхьабзэм хэлэжьагъэхэм чанэу Iоф зэришIэрэм, унагъохэм япхыгъэ Iофыгъохэм ренэу ынаIэ зэратыригъэтырэм афэшI КъумпIыл Мурат зэрэ­фэразэхэр къаIуагъ.
АР-м и ЛIышъхьэ
ипресс-къулыкъу къытырэ
къэбархэмкIэ ЛIышэ Саныет.