Адыгеим и ЛIышъхьэу КъумпIыл Мурат Мыекъопэ гарнизоным идзэ прокурорэу Максим Говоровым АР-м и Правительствэ зычIэт унэм IофшIэгъу зэIукIэгъу щыдыриIагъ. Iофтхьабзэм хэлэжьагъ АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец.

КъумпIыл Мурат IэнэтIакIэм гъэхъа­гъэхэр щишIынэу Максим Говоровым фэлъэIуагъ. Говоров Максим Владимир ыкъом 2006-рэ илъэсым ишышъхьэIу къыщегъэжьагъэу дзэм къулыкъу щи­хьыгъ, 2011-рэ илъэсым къыщегъэжьагъэу дзэ прокуратурэм икъулыкъухэм ащэлажьэ.
Республикэм ихэбзэ къулыкъухэм прокуратурэм икъулыкъухэм зэдэлэжьэныгъэ дэгъу зэрадыриIэр ыкIи тапэкIи ахэм язэпхыныгъэ зэрагъэпытэщтым ицыхьэ зэрэтелъыр Адыгеим и ЛIышъхьэ къыхигъэщыгъ.
УФ-м зыкъэухъумэжьынымкIэ и Министерствэ къыфэIорышIэрэ псэуа­лъэхэм террористическэ актхэр ащызэрамыхьанхэм, дзэ прокурорыр рес­публикэм иколлегиальнэ къулыкъухэм яIофшIэн зэрэхэлажьэрэм япхыгъэ Iофыгъохэр зэIукIэгъум къыщаIэты­гъэх.
Дзэ къулыкъушIэхэмрэ мобилизацием къыхиубытагъэхэмрэ яфитыныгъэхэм, яфедэхэм якъэухъумэнкIэ пшъэрылъэу щытхэм лъэныкъохэр атегущыIагъэх. ХэушъхьафыкIыгъэ дзэ операцием хэлажьэхэрэмрэ иветеранхэмрэ IэпыIэгъоу аратырэм шъхьафэу игугъу ашIыгъ.
Республикэм ипащэ зэрэхигъэунэфыкIыгъэмкIэ, хэушъхьафыкIыгъэ дзэ операцием хэлажьэхэрэм, иветеранхэм, ахэм яунагъохэм апае агъэнэфэгъэ федеральнэ IэпыIэгъу пстэури респуб­ликэм щарагъэгъоты, шъолъыр мэхьанэ зиIэ фэгъэкIотэныгъэ заули афашIы.
«ХэушъхьафыкIыгъэ дзэ операцием хэлажьэхэрэм ыкIи ахэм яунагъохэм арысхэм IэпыIэгъу ягъэгъотыгъэныр республикэм ихэбзэ къулыкъухэм апэрэ чэзыоу анаIэ зытырагъэтырэ лъэныкъохэм ащыщ. Къэралыгъо фондэу «Хэгъэгум иухъумакIохэр» зыфиIорэм мы лъэныкъомкIэ бэ зэшIуи­хырэр, тикъулыкъухэм, муниципалитетхэм, общественнэ организациехэм, партиеу «Единэ Россием» хэтхэм мы Iофым яIахьышIу къыхалъхьэ. Тидзэ­кIолIхэм, ахэм ягупсэхэм юридическэ IэпыIэгъу ягъэгъотыгъэныр, яфитыныгъэхэр къэухъумэгъэнхэр тиIофшIэн изы Iахьышхоу щыт», — къыIуагъ Адыгеим и ЛIышъхьэ.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.