Лъэпкъ тхакIоу МэщбэшIэ Исхьакъ ыныбжь илъэс 95-рэ зэрэхъугъэм фэгъэхьыгъэ пчыхьэзэхахьэу Мыекъуапэ щыкIуагъэр къэлэдэсхэм лъэшэу ашIогъэшIэгъоныгъ. ЗэхэщакIохэри, хэлэжьагъэхэри, еплъыгъэхэри яшIошIхэмкIэ къыддэгощагъэх.

Поэтическэ Iофтхьабзэм АР-м и Театральнэ зэхахьэ кIэщакIо фэхъугъ. Лъэпкъ тхакIом ипрозэ къыхэхыгъэ пычыгъохэу ыкIи иусэхэу, зэкIэмкIи итхыгъэ 25-рэ фэдиз, пчэгум щагъэIугъ. ТхэкIошхом илитературэ цIыфхэм нахь ягъэшIэгъэныр ыкIи поэзием, лъэпкъ культурэм агухэр къыфэгъэущыгъэнхэр Iофтхьабзэм изэхэщакIохэм пшъэрылъ шъхьаIэу зыфагъэуцужьыгъ.
Адыгабзэмрэ культурэмрэ якъэухъу­мэн МэщбэшIэ Исхьакъ иIахьышхо зэрэхишIыхьэрэр къэгущыIагъэхэм къы­хагъэщыгъ.
— Мы пчыхьэзэхахьэр анахьэу зыфэгъэхьыгъэр тиныбжьыкIэхэм МэщбэшIэ Исхьакъ итворчествэ апэблагъэ тшIыным, тхакIом ищыIэныгъэ зыфигъэхьыгъэ тарихъ Iотэным, лъэпкъым ицIыфхэу, тикультурэу, тичIыналъэу зыфэтха­гъэхэм, зыфэусагъэхэм ащ ынэкIэ ядгъэплъынхэм апай. Илъэсыбэрэ итхыгъэхэмкIэ лъэп­къым фэлэжьагъ. Ащ ихъишъэ дунаим щызэлъаригъэшIагъ. МэщбэшIэ Исхьакъ итхыгъэхэм атехыгъэ спектаклэхэм игъэкIотыгъэу тадэлажьэ, ахэр Лъэпкъ театрэм ыгъэуцущт. 2027-рэ илъэсым Лъэпкъ театрэр зызэхащагъэр илъэс 90-рэ зэрэхъурэм ипэ­гъокIэу спектаклэхэр къэгъэлъэгъоным фэхьазырыщтых, — къыIуагъ Лъэпкъ театрэм ихудожественнэ пащэу Ацумыжъ Рустам.
АР-м и Лъэпкъ театрэу Цэй Иб­рахьимэ ыцIэ зыхьырэм иактрисэу Тхьакъохъо Мэрджанэт къэгъэлъэгъоным хэлэжьагъ.
— Сэ МэщбэшIэ Исхьакъ иусэхэр сикIасэх. Усэ пэпчъ щыIэныгъэр къыреIотыкIы. Зы усэр, профессиональнэ лъэныкъомкIэ уеплъымэ, пьесэ псау хъурэм фэд. Ащ тхакIом хилъхьагъэр къызэрэбгурыIорэр цIыфхэм анэбгъэсынэу амал уиI. Роман 60-м ехъу, усэхэр ыкIи прозаическэ тхыгъэхэр зыдэт тхылъ пчъагъэ МэщбэшIэ Исхьакъ къыдигъэкIыгъ, бзэ зэфэшъхьафхэмкIэ ахэр зэрадзэкIыгъэх. Адыгэ Республикэм игимн игущыIэхэри зытхыгъэр ары. ТхэкIошхом и Хэгъэгу ыкIи ышIэрэ Iофым зэрафэшъыпкъэмкIэ, шIу зэрилъэгъухэрэмкIэ ищыIэныгъэ гъогу зэрэщытэу тищысэтехыпI, — къыIуагъ Мэрджанэт.
Пчыхьэзэхахьэм къекIолIагъэхэм ащыщэу Къазый Фатимэ ипхъорэлъфхэр игъусэу къэгъэлъэгъоным еплъыгъэх.
— Непэрэ пчыхьэзэхахьэм артистхэр усэхэм къызэрэщяджагъэхэр лъэшэу сыгу рихьыгъ. Видеопроекцием иамал театрэм хьалэмэтэу ыгъэфедагъ, лъэпкъ шъуашэу актерхэм ащыгъхэр дэхэ дэдагъэх. Силъфыгъэхэмрэ сипхъорэлъфхэмрэ МэщбэшIэ Исхьакъ иусэхэм нэIуасэ афэсшIынхэу къыздэсщагъэх. ЛIэужыкIэм лъэпкъым итхэкIо, усэкIо цIэрыIохэр ышIэн фае. МэщбэшIэ Исхьакъ илитературнэ кIэн лъэпкъым ибаиныгъэу сэлъытэ. Ащ итхыгъэхэр лIэужыкIэм едгъэшIэнхэр нахьыжъхэмкIэ типшъэрылъ, — къыIуагъ Фатимэ.
АР-м и Театральнэ зэхахьэ ыгъэуцурэ къэгъэлъэгъон пэпчъ уасэ фашIэу театрэр шIу зылъэгъухэрэм агъэлъапIэ, мызыгъэгум бэмэ хагъэунэфыкIыгъэр культурэм ылъэныкъокIэ бжыхьэм ианахь хъугъэ-шIэгъэ хьалэмэтхэм ащыщ ар зэрэхъугъэр ары.
Лъэпшъыкъо Фатим.