Къэралыгъо академическэ ансамблэу «Налмэсым» къэлэдэсхэм шIухьафтын афишIыгъ — къэшъокIо купым ыцIэ зыхьырэ псэуалъэм иунэщыдыбжь (балкон) оркестрэм мэкъамэхэр къыщыригъэIуагъэх.

Концерт унэм ыпашъхьэ, щагум дэтхэу, ыпкIэ хэмылъэу шIоигъоныгъэ зиIэхэр зэкIэ ащ едэIунхэ алъэкIыгъ. ЗышIагъэхэр пэшIорыгъэшъэу чIыпIэм къекIолIагъэх, ащ икъэбар зэхэзымыхыгъэхэм мэкъэмэ Iэмэ-псымэхэм яжъынч чIыпIэм къырищэлIагъэх. IофшIэгъу мэфэ ужым зэмыжэгъэхэ зыгъэпсэфыгъо дахэ ар бэмэ афэхъугъ. Концерт къэгъэлъэгъуапIэу агъэкIэжьыгъэм итеплъэрэ адыгэ мэкъамэхэмрэ чIыпIэм хьалэмэтыгъэ къыхалъхьагъ.
— Мыщ фэдэ Iофтхьабзэр зэрэредгъэкIокIырэр апэрэ. ЦIыфхэм ар агу рихьыщтмэ, ашIогъэшIэгъоныщтмэ ащкIэ зэдгъэшIэщт. Ом изытет къытфидэ хъумэ, ахэр хабзэ тфэхъущтхэн фае. Тиконцертхэм нахьыбэрэм къакIохэрэр къэлэдэс­хэр ары. Арышъ, ахэм апае ыпкIэ хэмылъэу зыгорэхэр къафэдгъэлъагъозэ тшIынэу, щыдгъэгушIукIынхэу тыфай, — къыддэгощагъ Къэралыгъо академическэ къэшъокIо купэу «Налмэсым» ихудожественнэ пащэу Хъоджэе Аслъан.
«Налмэсым» иоркестрэ щыкIэрэ щымыIэу къэгъэлъэгъоным хэлэжьагъ. Нахьыбэу къырагъэIуагъэхэр адыгэ лъэпкъ мэкъамэхэр ары. ЫпэкIэ лъэпкъ пстэуми ямэкъамэхэри хагъэхьащтых.

Анцокъо Ирин.