Спорт гимнастикэмкIэ Ростов-на-Дону илъэс къэс щыкIорэ зэнэкъокъухэу Арам Теракян ыцIэкIэ агъэнэфэгъэ Кубокыр къыдэхыгъэным фэгъэхьыгъэхэм Адыгеим илIыкIохэр хэлэжьагъэх.

Зэнэкъокъухэм спортсменкэ ныбжьыкIэ 80 зэращэлIагъ. Адыгеир ахэм къащагъэлъэгъуагъ Камилла Стребковам (спортым имастерынымкIэ кандидат), Елизавета Деркачевам (апэрэ разряд иI) ыкIи Алиса Ситниковам (ятIонэрэ разряд). Пшъэшъэжъы­ехэм спорт еджапIэу В. С. Максимовым ыцIэ зыхьырэм зыщагъасэ.
Тиспортсменкэхэм дэгъоу зыкъагъэлъэгъуагъэми, хагъэунэфыкIырэ чIыпIэ къыдэзыхын зылъэкIыгъэр Камилла Стребко­вар ары ныIэп. Ащ зэнэкъо­къум ятIонэрэ чIыпIэр щиубытыгъ ыкIи джэрз медаль къыхьыгъ.

Камиллэ итекIоныгъэ икъэкIопIагъ ежь спортсменкэм Iоф зэрэзыдишIэжьыгъэмрэ итренер IэпэIасэхэм ащ халъхьэгъэ кIуа­чIэмрэ.
Анна Перепелица ыкIи ХьакIмэфэ Светланэ агъэсэрэ пшъэшъэ­жъыехэм апэрэ илъэсэп текIоныгъэхэр къызыдахыхэрэр, Адыгеир чIыпIабэхэм ахэм къащагъэлъагъо. Тренерхэм яIэпэIэсэныгъэ, нэбгырэ пэпчъ екIолIэкIэ хэхыгъэ къызэрэфагъотырэр, загъэсэнымкIэ амалышIухэр пшъэшъэжъыехэм зэрарагъэгъотырэр а текIоныгъэхэм алъапс.

Елизавета Деркачевамрэ Алиса Ситниковамрэ уащытхъуныр атефэ. ХагъэунэфыкIырэ чIыпIэхэр пшъэшъэжъыехэм къахьын амылъэкIыгъэми, текIоныгъэм лъэшэу фэбэнагъэх, ухьазырыныгъэ дэгъу къагъэлъэгъуагъ. Мыщ фэдэ зэнэкъокъухэр спорт­сменхэмкIэ егъэджэпIэшIу мэ­хъух. Хэукъоныгъэу ашIыгъэхэм Iоф задашIэжьырэм ыуж текIоныгъэхэм зэрафэкIощтхэм уицы­хьэ телъынэу щыт.
Мы турнирыр гимнасткэ ныбжьыкIэхэм заушэтыным, текIоныгъэм фэбэнэнхэм имызакъоу, ежь спортсменкэхэмкIи ятренерхэмкIи зыгъэсэпIэ, яIэпэIэсэныгъэкIэ зы­щызэхъожьыхэрэ чIыпIэу щыт. КIэлэцIыкIухэр нахьыбэу мы спорт лъэпкъ дахэм хэщэгъэнхэмкIи ащ фэдэ Iофтхьабзэхэр амалышIух.