Адыгеим и ЛIышъхьэу КъумпIыл Мурат Кавказ клубэу Амман (Иорданиер) щыIэм итхьаматэу Самир Бакир республикэм и Правительствэ зычIэт унэм щыIукIагъ.

ЗэIукIэгъум хэлэжьагъэх АР-м и ЛIышъ­хьэ IэкIыб къэрал зэпхыныгъэхэмкIэ ыкIи инвестициехэмкIэ иIэпыIэгъоу Хьакъунэ Бэллэрэ Мыекъопэ къэралыгъо технологическэ университетым лъэпкъ дипломатиемкIэ и Гупчэ ипащэу Саид Мусхаджиевымрэ.
Iофтхьабзэм хэлэжьагъэхэр Урысыемрэ Иорданиемрэ язэфыщытыкIэшIухэр зэрэлъагъэкIотэщтым, кавказ диаспорэм ащкIэ мэхьанэу иIэм атегущыIагъэх. Адыгеим и ЛIышъхьэ игуапэу игугъу къы­шIыгъ Иорданием ипачъыхьэу ЯтIо­нэрэ Абдалла зэIукIэу дыриIэгъагъэм, Урысыемрэ Иорданиемрэ нахь зэпэблагъэ хъунхэмкIэ амалышIухэр зэрэщыIэхэр ащ къызэрэщиIогъагъэм.
«БизнесымкIэ, культурэмкIэ, социальнэ лъэныкъомкIэ тизэдэлэжьэныгъэ зызэредгъэушъом­бгъущт лъэныкъуабэмэ татегущыIэгъагъ. Пачъыхьэу ЯтIонэрэ Абдалла адыгэу Иорданием щыпсэухэрэм хэгъэгум ищыIэныгъэ яIахьышхо зэрэхашIыхьэрэр къыхигъэщыгъагъ. Иорданием щыпсэурэ адыгэхэм якультурэ, яхабзэхэм якъызэтегъэ­нэжьын мэхьанэшхо зэриIэр джащыгъум ащ къыкIигъэтхъыгъагъ», — къыIуагъ КъумпIыл Мурат.
ЗэIукIэгъум илъэхъан Самир Бакир Иорданием ипачъыхьэу ЯтIонэрэ Абдалла ышэу Хашим, Кавказ клубым ипрезидент гъэшIуагъэу щытым, исэлам фабэ къызэралъигъэIэсыжьырэр къыIуагъ. Къызэрэригъэблэгъагъэм фэшI КъумпIыл Мурат зэрэфэразэр, культурэ, чIыопс кIэнымкIэ Урысые научнэ-ушэтэкIо институтэу Д. С. Лихачевым ыцIэкIэ щытым къызэрэригъэблэгъагъэм тетэу Урысыем къызэрэкIуагъэр Самир Бакир къыхигъэ­щыгъ. Араб шIэныгъэлэжь-ушэтакIохэм я Союз зэрэхэтым елъытыгъэу, зигугъу къэтшIыгъэ учреждением ащ гъусэныгъэ пытэ дыриI. Самир Бакир дунэе конференциеу «Темыр Кавказым икультурнэ кIэн дунэе зэгурыIоныгъэмкIэ амалышIоу щыт» зыфиIорэм хэлэжьагъ.
Адыгеим ыпэкIи зэрэщыIагъэр хьакIэм къыхигъэщыгъ. 1998-рэ илъэсым пачъы­хьэм ыкъоу Али шыоу республикэм къызэкIом ар игъусагъ.
«Ащ ыуж Адыгеими, Мыекъуапи лъэшэу зызэрахъокIыгъ. Джащы­гъум шъуиреспубликэ сыкъэкIонэу, хьакIэхэр лъэшэу зыгъэлъэпIэрэ цIыфышIухэм саIукIэну синасып къызэрихьыгъагъэм лъэшэу сырэгушхо», — къыIуагъ Самир Бакир.
Шъугу къэдгъэкIыжьын Кавказ спорт клубэу Амман щыIэр къалэу Зарка дэс чэчэнхэм 1932-рэ илъэсым зэрэзэхащэгъагъэр, Иорданием испортсменхэмрэ спортыр зикIасэхэмрэ ащ зэрэзэфищэгъагъэхэр, спорт лъэпкъ зэфэшъхьафхэм язегъэушъомбгъун иIахьышIу зэрэхишIы­хьагъэр. Лъэпкъэу къызхэкIыгъэхэм емы­лъытыгъэу, Кавказым къыщыхъугъэ лъэпкъхэм къатекIыжьыгъэхэр джы къыз­нэсыгъэми организацием зэ­репхых.
НыбжьыкIэхэм япIункIэ, хабзэхэмрэ культурэмрэ якъэухъумэнкIэ спортым мэхьанэшхо зэриIэр, хэгъэгум ихэхъоныгъэхэм ащ иIахьышIу зэрахишIыхьэрэр КъумпIыл Мурати хьакIэми зэIукIэгъум къыщаIуагъ. Республикэм и ЛIышъхьэ зэрилъытэрэмкIэ, спортымрэ физическэ культурэмрэ Урысыем мэхьанэшхо зэрэщаратырэм фэдэу, ащ щыпсэурэ лъэпкъ­хэри якультурэкIэ зэрэгъэбаижьых. УФ-м инэмыкI шъолъырхэм яспортсменхэм афэдэу, Адыгеим испортсменхэми хэгъэ­гум щызэхащэрэ зэнэкъокъухэм гъэхъэ­гъэшIухэр ащашIы.
Иорданием щыпсэурэ кавказ лъэпкъхэм абзэ, якультурэ къэухъумэгъэнхэм, лъэпкъ дипломатием ихабзэхэм Урысыем зыщягъэушъомбгъугъэным япхыгъэ Iофыгъохэми зэIукIэм щатегущыIагъэх. ГъэсэныгъэмкIэ, псауныгъэм икъэухъу­мэнкIэ, бизнесымкIэ хэгъэгуитIум язэпхыныгъэ нахь зэрэпытагъэр мыщ къыщыхагъэщыгъ.
Адыгеим и ЛIышъхьэ Иорданием и Черкес шIушIэ обществэ инахьыжъхэми, ащ хэтхэми исэлам фабэ арихыжьынэу хьакIэм елъэIугъ. КъумпIыл Мурат шъхьа­фэу къыхигъэщыгъ гъэрекIо мы обществэм хэтхэр Адыгеим къызэкIохэм зигъо алъэгъугъэ IофыгъохэмкIэ Урысыем ипащэхэм къазэрадырагъэштагъэр.
АР-м и ЛIышъхьэ
ипресс-къулыкъу къытырэ
къэбархэмкIэ ЛIышэ Саныет.