Iоныгъом и 14-м Адыгеим зыкI мэкъэтыным имафэ щыкIуагъ. Республикэм мы мафэм хэдзын тедз щызэхащагъэр. Муниципальнэ образо­ванием инароднэ депутатхэм я Совет идепутатхэр Тэхъутэмы­къое ыкIи Мые­къопэ районхэм ащаха­дзыгъэх.

АР-м хэдзынхэмкIэ и Гупчэ комиссие къызэритыгъэмкIэ, Мыекъопэ районымкIэ хэдзыным хэлэжьэнэу щытым ипроцент 29-рэ къекIолIа­гъэр. Депутат хъунэу фэе нэбгыри 5-мэ зыкъагъэлъэгъуагъ. Ахэм ащыщэу анахь мэкъабэ зыфатыгъэр политическэ партиеу «Единэ Россием» къыгъэлъэгъогъэ Евгений Волковыр ары. Процент 77,33-мэ амакъэ ащ фатыгъ.
Тэхъутэмыкъое районыр пштэмэ, къэлэ гъэпсыкIэ зиIэ псэупIэу Яблоновскэм, поселкэу Перекатнэм ыкIи къуаджэу АдыгеякIэм ащыпсэурэ нэбгырэ мини 9,5-рэ хэдзыным хэлэжьэнхэ фитыгъэх. ЗэкIэмкIи хэдзын чIыпIи 6-мэ процент 23,10-рэ къякIолIагъэр. МандатитIу зиIэ хэ­дзын чIыпIэу N 8-м муниципальнэ образованием инароднэ депутатхэм я Совет идепутат хъунэу нэбгыри 6-мэ зыкъыщагъэлъэгъогъагъ. Ахэм ащыщэу анахь мэкъабэ зыфатыгъэр (процент 81,33-рэ) политическэ партиеу «Единэ Россием» къыгъэлъэгъогъэ Римма Кургановар ары.
РайонымкIэ мандатитф зиIэ хэдзы­пIэ коеу N 1-мкIэ текIоныгъэ къыдэзыхыгъэхэр политическэ партиеу «Единэ Россием» къыгъэлъэгъогъэхэ Хьанэхъу Ислъамрэ (процент 83,76-рэ) ЛъэпцIэрышэ Чэсэбыйрэ (процент 80,10-рэ). ЗэкIэмкIи хэдзын чIыпIэмэ процент 23,10-рэ къякIолIагъ.
ДЕЛЭКЪО Анет.