ГъогурыкIоным ишапхъэхэр ашIэнхэм фэшI
Урысые Iофтхьабзэу «ГъогурыкIоныр щынэгъончъэным и ЗыкI тхьамаф» зыфиIорэм къыдыхэлъытагъэу тыгъуасэ Адыгэ республикэ гимназием Iофтхьабзэ щыкIуагъ. Къэралыгъо автоинспекцием иIофышIэхэм кIэлэеджакIохэм гъогурыкIоным ишапхъэхэр джэгукIэ шIыкIэм тетэу агу къагъэкIыжьыгъэх.
— Хабзэ зэрэхъугъэу, мы тхьамафэм къыхиубытэу гурыт еджапIэхэр къэтэкIухьэх. Ар тетэгъафэ гъогурыкIоныр щынэгъончъэным и Мафэу агъэнэфагъэм — Iоныгъом и 17-м. ГъогурыкIоныр щынэгъончъэнымкIэ лабораторием иIофышIэхэр тигъусэхэу пэублэ классхэм ащеджэхэрэм гущыIэгъу тафэхъу, джэгукIэ шIыкIэм тетэу шапхъэхэр ятэгъашIэх, агу къэтэгъэкIыжьых. Сабыим ицIыкIугъом къыщегъэжьагъэу шапхъэхэр ышIэнхэ фае. Гукъау нахь мышIэми, зыныбжь имыкъугъэхэр зыхэфэрэ гъогу хъугъэ- шIагъэхэм япчъагъэ макIэп. Мы илъэсым пыкIыгъэ мэзи 8-р пштэмэ, илъэс 16-м нэс зыныбжьхэр зыхэфэгъэ гъогу хъугъэ-шIэгъэ 28-рэ республикэм щагъэунэфыгъ. Ахэр нахьыбэрэмкIэ автомобилым нахьыжъхэм адисыгъэх, нэбгыри 9-мэ гъогур зэпачыщтыгъ, ащ щыщэу хъугъэ-шIэгъи 6-р ежь сабыимэ ялэжьагъ. Анахь тызыгъэгумэкIырэмэ ащыщ зыныбжь имыкъугъэхэр рулым зэрэкIэрытIысхьэхэрэр. Ащ фэдэ зы нэбгырэ гъогу хъугъэ-шIагъэм хэфагъ ыкIи хэкIодагъ, — къыIуагъ АР-м хэгъэгу кIоцI IофхэмкIэ и Министерствэ гъогурыкIоныр щынэгъончъэнымкIэ и ГъэIорышIапIэ иотдел ипащэу Алексей Чмыревым.
КъулыкъушIэхэм къараIуагъэр кIэлэцIыкIухэм нахь къагурыIоным пае зэгъусэхэу еджапIэм пэблэгъэ гъогухэу лъэсэу узэрыкIон плъэкIыщтхэм арыкIуагъэх ыкIи чIыпIэ зэфэшъхьафхэр зэпачыгъэх. КIэлэцIыкIухэм гъогум тет тамыгъэхэм къарыкIырэр ыкIи нэфрыгъуазэм епхыгъэ шапхъэхэр къаIуагъэх, гъогум нахь узыщысакъын фэе чIыпIэу иIэхэр агурагъэIуагъ.
Я 3-рэ классхэм якIэлэегъаджэу Гъыщ Заремэ къызэриIуагъэмкIэ, кIэлэцIыкIухэмкIэ мыщ фэдэ Iофтхьабзэхэм мэхьанэшхо яI. ГъогурыкIоным ишапхъэхэр дэгъоу ашIэным пае апэрэ мафэм къыщегъэжьагъэу ежьхэм игъэкIотыгъэу Iоф адашIэми, къулыкъушIэхэм къараIорэр ашIогъэшIэгъон, агу къенэжьы.
Шъугу къэдгъэкIыжьын, гъогурыкIоныр щынэгъончъэным и ЗыкI тхьамафэ илъэс къэс зэхащэ ыкIи пшъэрылъ шъхьаIэу иIэр кIэлэцIыкIу гъогу-транспорт фыкъоныгъэр нахь макIэ шIыгъэныр ары. ЗыкI тхьамафэм къыдыхэлъытагъэу республикэм ит гъэсэныгъэ учреждениехэм инспекторхэм ЮИД-м иотрядхэр, кIэлэегъаджэхэр яIэпыIэгъухэу гъогурыкIоныр щынэгъончъэным иамалхэр къызщыраIотыкIыщт Iофтхьэбзэ зэфэшъхьафхэр рагъэкIокIыщтых.
ДЕЛЭКЪО Анет.