Хьафизэхэм ягъэмэфэ Урысые Спартакиадэу Московскэ хэкум щыкIуагъэм Адыгеим испортсменхэм дэгъоу зыкъыщагъэлъэгъуагъ.

Спорт лъэпкъи 6-мкIэ ащ хэлажьэхэрэр зэнэкъокъугъэх: гол­болыр, футбол-футзале, шахматхэр, шашкэхэр, пауэрлифтингыр ыкIи столкIыIу теннисыр. Тиспорт­сменхэм ухьазырыныгъэ дэгъу зэряIэр ыкIи текIоныгъэм амалэу яIэмкIэ зэрэфэбэнэщтхэр къагъэ­лъэгъуагъ. Къалэу Раменскэм республикэр къыщагъэлъэгъуагъ «СШАС паралимпийского и сурдлимпийского резерва» зыфаIорэм иатлетхэм.
ГолболымкIэ ныбжьыкIэ командэу Илья Кошелевыр, Владислав Рауд ыкIи Владислав Чернышен­кэр зыхэтыгъэхэм тыжьын медалыр къахьыгъ. Хъулъфыгъэ коман­дэхэмкIэ джащ фэдэу тыжьыныр къыдахыгъ Шорэхэу Бислъанрэ Руслъанрэ, Сихъу Сэфэрбый, Данил Семчуковым.
Адыгеим ипшъашъэхэу Мария Филипповам, Анна Иванкинам ыкIи Алиса Крикоровам джэрзыр къафагъэшъошагъ. Алина Пристанскаям, Мария Филипповам ыкIи Анна Иванкинам бзылъфыгъэ турнирым тыжьын медальхэр къыщыдахыгъэх.
Илья Кошелевым (а 1-рэ чIыпIэр къыхьыгъ) ыкIи Мария Филипповам (я 3-рэ чIыпI) пауэрлифтингым дэгъоу зыкъыщагъэлъэгъуагъ. Татьяна Хурс шахматхэмкIэ зэнэкъокъум ятIонэрэ чIы­пIэр щиубытыгъ. Мы къэгъэлъэгъонхэм яшIуагъэкIэ Адыгеим икомандэ Спартакиадэм ящэнэрэ чIыпIэр къыщыдихыгъ, ятIонэрэ хъугъэ Красноярскэ краим икомандэ, апэрэ чIыпIэр ыубытыгъ Московскэ хэкум икомандэ.
Шъугу къэдгъэкIыжьын, мы илъэсым хьафизэхэм ягъэмэфэ Урысые Спартакиадэ апэрэу едзыгъуитIоу рекIокIыгъ. Шъолъыр зэнэкъокъухэр ащыкIуагъэх Красноярскэ краим, Адыгэ Респуб­ликэм, Архангельскэ, Свердловскэ ыкIи Московскэ хэкухэм. Ахэм сэкъатныгъэ зиIэ нэбгырэ 500 фэдиз ахэлэжьагъ, финалым — ныбжь зэфэшъхьаф зиIэ спорт­смен 300-м ехъу.