Теуцожь район хьыкумыр Тэхъутэмыкъое районым ит къуаджэу Щынджые щыщэу илъэс 40 зыныбжь хъулъфыгъэм иIоф хэплъагъ. Экстремизмэм хэщагъэу ар агъэмысагъ.

ЗэрагъэунэфыгъэмкIэ, бзэджэшIагъэ зезыхьагъэхэм пшъэдэкIыжь ягъэхьыгъэ­нымкIэ Федеральнэ къулыкъум АР-мкIэ и ГъэIорышIапIэ ихьапсхэм ащыщэу N 1-м ар дэсэу, дунэе движениеу «Арестантское уголовное единство» зыфиIорэм иидеологие нэмыкIхэм алъигъэ­Iэсыщтыгъ, ащ иIофшIэн чанэу хэлажьэщтыгъ, гухэлъэу иIэхэм япхырыщын ыуж итыгъ, шъхьэихыгъэу зэрэдыригъаштэрэр къыIощтыгъ, хабзэм илIыкIохэм уиягъэ ябгъэкIыным фэшI егъэзыгъэ Iоф ­зыхэлъ бзэджэшIагъэхэр зепхьанхэр тэрэзэу ыIощтыгъ.
ЩынэгъончъэнымкIэ Федеральнэ къу­лыкъум АР-мкIэ и ГъэIорышIапIэ иследственнэ отделение уголовнэ Iоф къызэIуихи, зэхэфынхэр кIуагъэх.
Теуцожь район хьыкумым хъулъфыгъэр мысэу ылъытагъ, режим пхъашэ зиIэ хьапсым илъэси 3-рэ мэзи 6-рэ щигъэкIонэу ыкIи ишъхьафитныгъэ зы илъэсрэ гъунапкъэхэр иIэнхэу ты­рилъхьагъ.
Хьыкумым рихъухьагъэм кIуачIэ иIэ хъугъэ.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ ипресс-къулыкъу.