Урысыем IофшIэнымкIэ и ЛIыхъужъэу, Адыгеим, КъБР-м, КъЧР-м, Абхъазым янароднэ тхакIоу, Урысые Федерацием и Общественнэ палатэ хэтэу МэщбэшIэ Исхьакъ ыныбжь илъэс 95-рэ зэрэхъугъэм фэгъэхьыгъэ поэтическэ пчыхьэзэхахьэр Пушкиным ыцIэкIэ щыт унэм ыпашъхьэ щыкIуагъ.

Адыгеим и ЛIышъхьэу КъумпIыл ­Мурат, АР-м культурэмкIэ иминистрэу Аулъэ Юрэ Iофтхьабзэм хэлэжьагъэх. МэщбэшIэ Исхьакъ итворчествэ зикIасэхэу тиреспубликэ щыпсэухэрэри, шъо­лъыр зэфэшъхьафхэм къарыкIыгъэ хьакIэхэри пчыхьэзэхахьэм къыщызэрэугъоигъэх.
Iофтхьабзэр рамыгъажьэзэ, респуб­ликэм ипащэ пчыхьэзэхахьэм изэхэщакIохэми, ащ хэлэжьэщтхэми адэгущыIагъ. Литературэр шIу языгъэлъэгъун зылъэкIыщт мыщ фэдэ Iофтхьабзэхэм мэхьанэшхо зэряIэр Адыгеим и ЛIышъхьэ къыхигъэщыгъ.
«Адыгэ литературэм иклассикхэу МэщбэшIэ Исхьакъ фэдэхэм якIэн ­Адыгеим имызакъоу, тихэгъэгушхо исыд фэдэрэ чIыпIи ренэу щагъэлъэпIэщт. ТичIыпIэгъу къыIэтырэ Iофыгъохэр хэгъэгу зэфэшъхьафхэм къащыхъугъэ, лъэпкъ зэфэшъхьафхэм къахэкIыгъэ цIыфхэм апэблагъэу, зигъо Iофыгъоу щытых», — къыIуагъ КъумпIыл Мурат.

Мы пчыхьэм АР-м и Театральнэ зэхахьэ иактерхэм МэщбэшIэ Исхьакъ иусэхэр, ипрозэ къыхэхыгъэ пычыгъохэр къаIуагъэх. ТхэкIо цIэрыIом икъоджэ гупсэ, лъэпкъ шъуашэм, блэкIыгъэ лъэ­хъаным, непэкIэ социальнэ Iофыгъоу къэуцухэрэм, Хэгъэгу зэошхом ТекIоныгъэр къыщыдэзыхыгъэхэм, зэо ужым хэгъэгур зыпкъ изыгъэуцожьыгъэхэм, республикэр ылъэ зэрэтеуцуагъэм ыкIи нэмыкIхэм афэгъэхьыгъэ гупшысэ ку­ухэр зыхэгъэщэгъэ усэхэр мыщ щыIугъэх.
МэщбэшIэ Исхьакъ пчыхьэзэхахьэр зэхэзыщагъэхэм зэрафэразэр къыIуагъ.
«ГъэшIэ гъогушхо къэскIугъ. Хъугъэ-­шIэгъэ зэфэшъхьафхэмкIэ ар баигъ, ау шIумрэ цIыфхэм ягуфэбагъэрэ апеIэн зи зэрэщымыIэр ренэу сшIошъ хъу­щтыгъ», — къыIуагъ МэщбэшIэ Исхьакъ.
ТхэкIо цIэрыIом пчыхьэзэхахьэм зэрэщыхигъэунэфыкIыгъэмкIэ, адыгэ ­лъэпкъым, ащ къыдэпсэухэрэм ягугъапIэхэм итворчестви, общественнэ щыIэныгъэми мэхьанэшхо сыдигъуи ащыритыщтыгъ.
Шъугу къэтэгъэкIыжьы МэщбэшIэ Исхьакъ творческэ кIэнышхо зэриIэр, тхылъ 90-м ехъу къызэрэдигъэкIыгъэр, ахэм ащыщыбэ бзэ зэфэшъхьафхэмкIэ зэрэзэрадзэкIыгъэр. ТхэкIо цIэрыIом Адыгэ Республикэм игимн ытхыгъ, илъэ­сыбэмэ къакIоцI тхыгъэ зэфэшъхьафхэр адыгабзэм рилъхьагъэх. Ащ зэридзэкIыгъэхэм ащыщ КъурIанымрэ «Слово о полку Игореве» зыфиIорэмрэ. Урыс тхакIохэм якъэлэмыпэ къыпыкIыгъэхэм ащыщхэр илъэс зэфэшъхьафхэм ащ зэридзэкIыгъэх. Итхылъэу «Бзыикъо заом» техыгъэу оперэ атхыгъ, ироманэу «Айщэт» зыфиIорэмкIэ художественнэ фильм зэхагъэуцуагъ.

Пчыхьэзэхахьэм МэщбэшIэ Исхьакъ итхыгъэ 25-рэ щыIугъ. Театральнэ зэхахьэм иартистхэр IэпэIэсэныгъэ ин ахэлъэу ахэм къяджагъэх. Видеопроекцием иамалхэр агъэфедэзэ художественнэ зэхашIэр нахь агъэлъэшыгъ. IэпэIасэу Мыгу Рузанэ артистхэм ащыгъыгъэ шъуашэхэм адэлэжьагъ, ащ иIэпэщысэхэр агъэфедагъэх. Образхэр нахь куоу къэтыгъэнхэмкIэ ишIогъэшхо къэкIуагъ.

— АР-м и Театральнэ зэхахьэ ­иIофышIэхэм непэрэ пчыхьэзэхахьэр зэрэзэхащагъэм пае сафэраз. ТичIыгогъу цIэрыIо ытхыгъэхэр мыщ фэдэ шIыкIэ гъэшIэгъон къыхагъэщи пчэгум зэрэщагъэIугъэхэм тиныбжьыкIэхэр литературэм, тарихъым, культурэм хэщэгъэнхэм нахь фэIорышIэщт. Исхьакъ Шумафэ ыкъом псауныгъэ пытэ иIэнэу, хъурэ-шIэрэм нэ чанкIэ сыдигъокIи зэрэ­лъыплъэрэм фэдэу тапэкIи лъигъэкIотэнэу сыфэлъаIо, — къыIуагъ АР-м и ЛIышъхьэу КъумпIыл Мурат.

Пчыхьэзэхахьэм Мыекъуапэ щыпсэу­хэрэр ыкIи ихьакIэхэр зэрищэлIагъэх. ТхэкIошхом иусэхэм, итворчествэ, ишIэжь пчэгур зэлъаубытыгъ. МэщбэшIэ Исхьакъ илитературнэ кIэн непэрэ мафэхэмкIэ ыкIи тапэ къэкIощтымкIэ мэхьанэшхо зиIэ баиныгъ, ащ игущыIэ лIэужхэр зэрепхых.