Президент платформэу «Урысыер — амалышIухэр зыIэкIэлъ къэралыгъу» зыфиIорэм ипроектэу «Это у нас семейное» зыцIэм иятIонэрэ зичэзыу едзыгъо хэлэжьэщтхэм ятхын аухыгъ.

Ащ хэлажьэмэ зышIоигъо нэбгырэ 726191-мэ ялъэIу тхылъхэр къатыгъ. Нэбгырэ 1425-р Адыгеим щыщых, ар унэгъо командэ 461-рэ мэхъу.
УФ-м и Президентэу В. Путиным мы зэнэкъокъур «народнэу» зэрилъытагъэр къыгъэшъыпкъэжьыгъ ятIонэрэ едзы­гъом лъэпкъ зэфэшъхьафыбэ зэрэхэлажьэрэм. КъэIогъэн фае лъэпкъ проектэу «Унагъу» зыфиIорэм зэнэкъокъур изы Iахьэу зэрэщытыр.
Шъугу къэдгъэкIыжьын, проектым текIоныгъэ къыщыдэзыхыхэрэм япсэупIэ амалхэр нахьышIу ашIынхэмкIэ сомэ миллион тфырытф зэрыт сертификат 60 зэраратыщтыр.
ПэIудзыгъэ едзыгъор чъэпыогъум и 1-м аухыщт. Ащ пхырыкIыхэрэм финалныкъом яшъолъыр къыщагъэлъэ­гъощт. 2026-рэ илъэсым гъэмафэм унагъом, шIулъэгъум ыкIи зэфэшъыпкъэныгъэм я Мафэ кIэуххэр зэфахьысыжьыщтых.