АР-м хэгъэгу кIоцI IофхэмкIэ и Министерствэ кощын IофхэмкIэ и ГъэIорышIапIэ тыгъуасэ пресс-зэIукIэу щыкIуагъэр къулыкъум ипэщэ IэнатIэ зыгъэцэкIэрэ Елена Баклановам зэрищагъ.

УФ-м и Президент зыкIэтхэгъэ унашъоу «Республикэу Молдовам ицIыфхэу Урысые Федерацием къихьэхэрэм правовой чIыпIэу щаубытыщтым фэгъэ­хьыгъ» зыфиIоу 2025-рэ илъэсым бэ­дзэогъум и 25-м кIуачIэ зиIэ хъугъэм Iофтхьабзэр фэгъэхьыгъагъ.
— IэкIыб къэралыгъохэм къарыкI­хэу УФ-м ишъолъырхэм ащыпсэунхэу къарыхьэхэрэм алъэныкъокIэ хэбзэгъэуцугъакIэу къежьэхэрэм ягугъу тэшIы, ахэм ямэхьанэ цIыфхэм ядгъэшIэным тыпылъ. Унашъоу N 520-р анахьэу зыфэгъэхьыгъэр Республикэу Молдовам ицIыфхэу Урысыем Iоф щызышIэнхэу 2025-рэ илъэсым чъэпыогъум и 1-м къыщегъэжьагъэу къихьащтхэм патент ямыIэу джы лэжьэнхэ зэралъэкIыщтыр ары. Мы илъэсым чъэпыогъум и 1-м къыщегъэжьагъэу 2026-рэ илъэсым щылэ мазэм и 1-м нэс а купым хахьэхэрэм фитыныгъэу яIэр зэрагъэшIэным фэшI кощын IофхэмкIэ къулыкъухэм яподразделениехэм зафагъэзэн алъэ­кIыщт. ШIокI зимыIэ дактилоскопическэ регистрацие арагъэ­кIущт ыкIи сурэт атырахыщт, — къыIуагъ полицием иподполковникэу Елена Баклановам.
Iофтхьабзэм къызэрэщыхагъэщыгъэмкIэ, хэбзэгъэуцугъакIэм къыхиубытэхэрэп УФ-м ишъолъыр ыкIи ащ игъунапкъэхэм ашIокIэу бзэджэшIагъэхэр зезыхьагъэхэр, хьапс зытелъэу зымыпщыныжьыгъэхэр, къэралыгъо гъунапкъэм фэгъэхьыгъэ хэбзэгъэуцугъэхэр зыукъохэрэр, лъэпкъ щынэгъончъагъэр зэщызгъакъохэрэр, общественнэ рэхьатныгъэр ыкIи щынэгъончъагъэр зыукъохэрэр, наркотикхэр ыкIи психотропнэ пкъыгъохэр зыгъэфедэхэрэр е ахэр къезыгъэкIокIыхэрэр.
— Республикэу Молдовам щыщэу тиреспубликэ къихьэрэр бэп, процентищ ныIэп. Ау IэкIыб къэралхэм къарыкIыгъэ нэбгырэ мин 11 фэдиз тишъолъыр щэ­псэу. Мы пчъагъэм студентхэри хэхьэх. Джащ фэдэу мы уахътэм ехъулIэу Iоф ашIэнымкIэ патент мини 7 фэдиз ятты­гъах, икIыгъэ илъэсым ар мини 3-м фэдизыгъ, — хигъэунэфыкIыгъ Е. Баклановам.
Iэшъынэ Сусан.