Укъэбзалъэхэм яапэрэ комплекс ия 2-рэ чэзыу атIупщынэу Iизын Мыекъуапэ къащаратыгъ. 2019-рэ илъэсыр ары псэуалъэм игъэкIэжьын зыфежьэгъагъэхэр.

1960 – 1980-рэ илъэсхэм ашIыгъэгъэ укъэбзалъэхэр уахътэм диштэу зэтырагъэпсыхьажьынхэр зэпхыгъа­гъэр къа­лэмрэ псэолъэшIынымрэ псынкIэу хэхъоныгъэ зэрашIыщтыгъэр ары.
Апэрэ чэзыум телъытэгъэ IофшIэнхэр 2021-рэ илъэсым ишэкIогъу аухыгъа­гъэх. 2021-м итыгъэгъазэ псэуалъэр атIупщыгъагъ. ЯтIонэрэ чэзыум хэхьэрэ IофшIэнхэр 2022 – 2025-рэ илъэсхэм агъэцэкIагъэх.
ЫпэрапшIэ ощхыпсхэр тIогъогогъо механическэу, етIанэ биохимическэу агъэкъабзэх, бактериехэу ахэм ахэлъ­хэр ультрафиолеткIэ агъэкIодых. Джырэ уахътэм диштэрэ технологиехэр къызыфагъэфедэхэзэ, укъэбзалъэхэр агъэ­кIэжьыгъэх, оборудованиякIэ ачIагъэуцуагъ.
АР-м и ЛIышъхьэу КъумпIыл Мурат зэрэхигъэунэфыкIыгъэмкIэ, федеральнэ гупчэр IэпыIэгъу къафэхъузэ, респуб­ликэм ищыкIэгъэ инфраструктурэ псэуалъэхэм зарагъэушъомбгъу. Джырэ шапхъэхэм адиштэрэ укъэбзалъэхэр Мыекъуапэ щыгъэпсыгъэнхэр ком­мунальнэ хъызмэтым игъэкIэжьынкIэ пшъэрылъ шъхьаIэхэм ащыщыгъ.
«Республикэм икъэлэ шъхьаIэ хэхъо­ныгъэ егъэшIыгъэнымкIэ Мыекъуапэ иукъэбзалъэхэр мэхьанэшхо зиIэ псэуалъэу щытых. Унэ пчъагъэу ашIырэм зэрэхахъорэм, предприятиякIэхэр зэрагъэпсырэм къахэкIэу комплексыр гъэ­кIэжьыгъэн фэягъ. Апэрэ комплексым гъэцэкIэжьын IофшIэнэу рашIылIагъэхэм яшIуагъэкIэ укъэбзалъэхэм акIуачIэ къахэхъуагъ, шапхъэу щыIэхэм адиштэу ощхыпсыр аукъэбзы, псым иIущын епхыгъэ фэIо-фашIэхэр нахьышIоу агъэ­цакIэ хъугъэ», — къы­Iуагъ министрэм игуадзэу Юрий Гордеевым.
Мыекъуапэ икоммунальнэ инфраструктурэ псэуалъэ зэрагъэкIэжьыгъэм гъунэ лъызыфыгъэр Урысыем псэолъэ­шIынымкIэ и Министерствэ къыфэIорышIэрэ федеральнэ бюджет учреждениеу «РосСтройКонтролыр» ары.