Егъэджэнхэр афызэхащэгъагъэх
АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет къэбар жъугъэм иамалхэм Iоф ащызышIэхэрэм апае егъэджэнхэр зэхищэгъагъэх. Хабзэ зэрэхъугъэу илъэс къэс Iофтхьабзэр рагъэкIокIы. Шъолъырым икъэралыгъо программэу лъэпкъ зэфыщытыкIэхэр гъэпытэгъэнхэм тегъэпсыхьагъэм ар къыдыхэлъытагъ.
Егъэджэнхэр рагъэжьэнхэм ыпэкIэ Комитетым итхьаматэу Долэ Долэт шIуфэчс гущыIэхэмкIэ ащ хэлажьэхэрэм закъыфигъэзагъ. Сэнэхьат гъэхьазырынымкIэ шъолъыр программэу «Адыгеим и ЛIыхъужъхэр» зыфиIорэм хэлажьэу, хэушъхьафыкIыгъэ дзэ операцием хэтыгъэу Александр Махнева пстэуми нэIуасэ афишIыгъ. Джырэ уахътэм Комитетым иIофшIэн ар хагъэгъуазэ.
— ХэушъхьафыкIыгъэ дзэ операциер зэрэкIорэм фэгъэхьыгъэ къэбар нэпцIхэр гъогогъу 500-рэ къыхаутыгъэу, агъэфедагъэу блэкIыгъэ илъэсым агъэунэфыгъ. КъэбарлъыгъэIэс «зао» къыташIылIагъэу, ар къызфагъэфедэзэ цIыфхэр агъэплъэхъух, — къыIуагъ Долэ Долэт.
Егъэджэнхэм къякIолIагъэхэм анэмыкIэу Интернетым иамалхэмкIэ зэпхыныгъэ зыдашIыгъэхэри ахэтыгъэх. Адыгэ Республикэм ижурналистхэм я Союз итхьаматэу ТIэшъу Светланэ «Лъэпкъ журналистикэм иеджапI» зыфиIорэ проектым республикэ грант къызэрэрихыгъэм къытегущыIагъ.
— АдыгабзэкIэ лэжьэрэ журналистхэр зэримыкъурэм къыхэкIэу мы Iофым ублапIэ Союзым фишIыгъ. Непэ ар анахьэу тызгъэгумэкIырэ лъэныкъохэм ащыщ. Тауж къикIыщт журналистхэр дгъэсэнхэ фае. ЗэкIэмэ анахь мэхьанэ зиIэр адыгабзэр дэгъоу ашIэныр ары. Ащ пае республикэм ирайон зэфэшъхьафхэм яеджапIэхэм зафэдгъэзэщт, кIэлэеджакIохэм заIудгъэкIэщт. Адыгабзэр анахь дэгъоу зышIэхэрэр къахэтхыщтых ыкIи гъэзетым, радиом, телевидением Iоф ащашIэн алъэкIынэу дгъэсэщтых. Проектым грантэу сомэ миллионрэ ныкъорэ къырихыгъ, ащ щыщэу сомэ мин 800-р техническэ Iэмэ-псымэхэм якъэщэфын пэIудгъэхьагъ, — къыIотагъ ТIэшъу Светланэ.
Джащ фэдэу пэIудзыгъэ шIыкIэмкIэ семинарым иIофшIэн къыхэлэжьагъ «Лентэм» ыкIи «Терминал ТАСС-м» яхэушъхьафыкIыгъэ проектхэм я ГъэIорышIапIэ ипащэу Карелия Андреевар ыкIи къэбарлъыгъэIэс агентствэу «Ru-News24.ru» зыфиIорэм иредактор шъхьаIэу Максим Шамрай. Якъулыкъухэм Iоф зэрашIэрэм ахэр къатегущыIагъэх, упчIэхэм джэуапхэр къаратыжьыгъэх.