Урысыем изаслуженнэ тренерэу, бзылъфыгъэ гандбольнэ клубэу «Адыифым» изэхэщэн кIэщакIо фэхъугъэ Джэнчэтэ СултIан ишIэжь фэгъэхьыгъэ кIэлэцIыкIу турнир Мыекъуапэ щырагъэкIокIыгъ. Илъэс къэс зэхащэрэ зэнэкъокъур мэфэ заулэрэ кIуагъэ, ащ команди 6 хэлэжьагъ.

Краснодар краим, Ростов хэ­кум ыкIи республикэм икъэлэ шъхьаIэ якомандэхэм заушэтыгъ. Медальхэм афэбэнэгъэ гандболисткэхэм аныбжь илъэс 11-м шIокIыщтыгъэп. Iофтхьабзэр Адыгэ къэралыгъо университетым физическэ культурэмкIэ ыкIи дзюдомкIэ и Институт щыкIуагъ.
Адыгеир къэзыгъэлъэгъуагъэ­хэр спорт еджапIэу С. М. Джэнчатэм ыцIэ зыхьырэм зыщызыгъасэхэрэр ары. Командэм ешIэ­гъоу иIагъэхэр зэкIэ къыхьыгъэх, текIоныгъэр къыдихыгъ. Ахэм ятренерыр ыпэкIэ «Адыифым» хэтыгъэ Дарья Силантьевар ары. ЯтIонэрэ чIыпIэр Новороссийскэ икомандэу «Факелым» къыдихыгъ, «Академия гандбола» (Краснодар край) ящэнэрэ хъугъэ.

ХагъэунэфыкIырэ чIыпIэхэр къыдэзыхыгъэхэм ямызакъоу, командэ пэпчъ иешIэкIо анахь дэгъур зэхэщакIохэм къыхагъэщыгъ. ТекIоныгъэр къыдэзыхыгъэ­хэм шIэжь шIухьафтынхэр афагъэшъошагъэх.