Къэралыгъо мэхьанэ зиIэ Iофтхьабзэу «Лъэпкъым икросс» зыфиIорэм Iоныгъом и 20-м Мыекъуапэ хэлэжьэщт. Мыщ ныбжь зэфэшъхьафхэр зиIэ цIыфхэр зэрепхых, псауныгъэр гъэпытэгъэным ыкIи спортым ямэфэкI шъыпкъ.

Илъэс къэс мыщ спортсменхэм, кIэлэеджакIохэм ыкIи апшъэ­рэ еджапIэхэм ачIэс студентхэм, спортым иветеранхэм ыкIи унагъохэм, чъэныр зыгу рихьырэ пстэуми зыщаушэты. Мыгъэрэ Iофтхьабзэр зыфэгъэхьыгъэр Хэгъэгу зэошхом ТекIоныгъэр къызщыдахыгъэм ия 80-рэ илъэс ихэгъэунэфыкIын ары.
Мыекъуапэ щыкIощт зэнэкъо­къум хэлэжьэщтхэр купитфэу гощыгъэщтых (аныбжь елъыты­гъэу). Хъулъфыгъэхэм ыкIи бзылъфыгъэхэм шъхьафэу заушэтыщт. 2012-рэ илъэсым къэхъугъэхэм ыкIи ахэм анахьыкIэхэм метрэ 1000, адрэхэм метрэ 2000 къа­чъыщт. Iофтхьабзэр республикэ стадионэу «Зэкъошныгъэм» сы­хьатыр 10-м щырагъэжьэщт.

Зэнэкъокъум ухэлэжьэным пае пэшIорыгъэшъэу къэралыгъо фэIо-фашIэхэм япортал зыщыптхын, джащ фэдэу уипсауныгъэ изытет шапхъэхэм зэрадиштэрэр зэрыт тхьапэр, страховой полисыр, паспортыр е свидетельствэр пIэкIэлъынхэ фае. Тхылъхэр зэкIэ Iоныгъом и 19-м нэс олимпийскэ резервым испорт еджапIэу N 1-м IэкIэбгъэхьанхэ фае. Iофтхьабзэм ухэлэжьэным пае ыпкIэ лъыптын ищыкIагъэп.