ЫпкIэ хэмылъэу афашIыщтых
ХэушъхьафыкIыгъэ дзэ операцием хэлажьэхэрэм цэхэр афыIуагъэуцонхэмкIэ фэгъэкIотэн ыпкIэ зыхэмылъ программакIэм игъэцэкIэн Адыгеим щырагъэжьагъ.
УФ-м псауныгъэр къэухъумэгъэнымкIэ и Министерствэ 2020-рэ илъэсым фэгъэкIотэн зиIэхэм цэхэр афэшIыгъэнхэм епхыгъэ унашъоу ышIыгъэм тишъолъыркIэ хэгъэхъожьынэу 2025-рэ илъэсым фашIыгъэм къыдыхэлъытагъэу джы дзэ операцием хэлэжьахэрэм зэтыгъо IэпыIэгъоу цэхэр афашIыщтых. Программэр 2026—2027-рэ илъэсхэми ателъытыгъэщт.
Нахь игъэкIотыгъэу программэм игугъу къэтшIымэ, цэ протез афашIыныр, афагъэцэкIэжьыныр е афызэблахъуныр мыщ къыхеубытэ ыкIи ар зэтыгъо IэпыIэгъоу щытыщт. Адыгэ республикэ клиническэ стоматологическэ IэзапIэм фэIо-фашIэр афигъэцэкIэщт. Дзэ операцием хэлажьэрэм имедицинэ къэгъэлъэгъонхэм ялъытыгъэу цэхэр фыIуагъэуцонхэмкIэ унашъор зышIыщтыр врач-цашIэр ары.
Къэралыгъо фондэу «Хэгъэгум иухъумакIохэр» зыфиIорэм исоциальнэ координаторхэм ветеранхэм ащ фэдэ амал яIэ зэрэхъугъэм икъэбар етIупщыгъэу алъагъэIэсы. ЯщыкIэгъэ IэпыIэгъур арагъэгъотынымкIэ Iофыр афызэхафы.
— ХэушъхьафыкIыгъэ дзэ операцием хэлажьэхэрэм япсауныгъэ анаIэ тетыным, ящыIэныгъэ нахьышIу шIыгъэным, фэгъэкIотэн зыхэлъ медицинэ IэпыIэгъур арагъэгъотыным зигугъу къэтшIырэ программэр фэIорышIэ, — хигъэунэфыкIыгъ ПIатIыкъо Аслъан.
Шъугу къэдгъэкIыжьын, Урысые Федерацием и Президентэу Владимир Путиным иунашъокIэ къэралыгъо фондэу «Хэгъэгум иухъумакIохэр» зыфиIорэр агъэпсыгъ. Пшъэрылъ шъхьаIэу иIэр хэушъхьафыкIыгъэ дзэ операцием хэлэжьэрэ нэбгырэ пэпчъ ыкIи ахэм яунагъохэм IэпыIэгъу ятыгъэныр ары. Медицинэ ыкIи социальнэ реабилитацием имызакъоу, егъэджэжьыгъэнхэр, IофшIэн ягъэгъотыгъэныр, юридическэ IэпыIэгъу ятыгъэныр, япсэупIэхэр япсауныгъэ изытет елъытыгъэу афызэтырагъэпсыхьанхэр къыхеубытэх. Фондым итхьаматэр УФ-м зыкъэухъумэжьынымкIэ иминистрэ игуадзэу — статс-секретарэу Анна Цивилевар ары.
Iэшъынэ
Сусан.