Хэукъоныгъэу ашIыгъэхэр чIиукъуащэхэзэ
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм Ространснадзорым имежрегиональнэ чIыпIэ ГъэIорышIапIэу Къыблэ Федеральнэ шъолъырым щыIэм къэралыгъо автомобиль гъогухэм алъыплъэгъэнымкIэ иотдел ипащэ игуадзэ къуалъхьэ къаIихыгъэу къаубытыгъ.
Урысыем и Следственнэ Комитет иследственнэ гъэIорышIапIэу АР-м щыIэм щынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм къаугъоигъэ материалхэм къапкъырыкIызэ уголовнэ Iоф къызэIуихыгъ.
ЗэрагъэунэфыгъэмкIэ, 2021-рэ илъэсым ибэдзэогъу мазэ къыщыублагъэу 2024-м имэкъуогъу нэс унэе предпринимателитIумэ хьылъэзещэ автомашинэхэм ягъэзекIонкIэ административнэ хэукъоныгъэу ашIыгъэхэм апае пшъэдэкIыжь амыхьыным фэшI сомэ мин 229-рэ къаригъэтыгъ. Тазыр амытыным фэшI къуалъхьэу къаштэн фаер зыфэдизыр ащ тхьапэм афытыритхэщтыгъ. Ахъщэр нэмыкI горэм исчет къырагъахьэщтыгъ.
А илъэс дэдэхэм янэмыкI мазэхэм пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Белнерудтрансым» ипащэ игуадзэ сомэ мин 490-рэ къыIихыгъ, 2022-рэ илъэсым имэкъуогъу мазэ къыщегъэжьагъэу 2024-м ишышъхьэIу нэс «Транс Логист» зыфиIорэ хъызмэтшIапIэм ипащэрэ унэе предпринимателымрэ зэхэубытагъэу сомэ мин 695-рэ къыратыгъ.
Ахэм анэмыкIэу, пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «НК-Монолит» зыфиIорэм ипащэ игуадзэрэ унэе предпринимателымрэ сомэ мин 570-рэ къаригъэтыгъ, хьылъэзещэ автомашинэхэм ягъэзекIонкIэ административнэ хэукъоныгъэу ашIыгъэхэм апае пшъэдэкIыжь амыхьыным фэшI унэе предпринимательхэм, зыхэм сомэ мин 955-рэ, адрэхэм сомэ мин 818-рэ къаIихыгъ.
Мы уахътэм зэхэфынхэр макIох, бзэджэшIагъэр зэрихьаным лъапсэ фэхъугъэр агъэунэфы.
ЩынэгъончъэнымкIэ Федеральнэ къулыкъум АР-мкIэ
и ГъэIорышIапIэ ипресс-къулыкъу