ИлъэсыкIэ еджэгъур заублагъэм къыщегъэжьагъэу Къэралыгъо автоинспекцием зэшIуихырэ Iофтхьабзэхэм къахэхъуагъ.

Республикэм ит еджапIэхэм мафэ къэс кIэлэцIыкIу минипшI пчъагъэ къя­кIуалIэ, ахэм янахьыбэр лъэсрыкIохэу гъогухэм къатехьагъэх. Джащ фэдэу ахэр зыщеджэхэрэ чIыпIэхэм зэранагъэсыщтхэм пае ны-тыхэм зэхапшIэу нахь автомобилыбэ агъэфедэ хъугъэ.
ЗэкIэми анахь Iофыгъо шъхьаIэу къэуцурэр кIэлэцIыкIухэу лъэсэу ежь-ежьырэу еджапIэм кIохэу, нэужым унэм къэкIожьыхэрэм япхыгъ. Мыхэм гъогоу акIурэр щынэгъончъэу щытын, ны-тыхэр ахэм алъыплъэнхэ фае.

Мы мафэхэм Къэралыгъо автоинспекцием иIофышIэхэм кIэлэеджакIохэми кIэлэегъаджэхэми заIуагъакIэ ыкIи гъо­гум узэрэщызекIон фэе шапхъэхэр къафаIуатэх. Ахэр тэрэзэу ини цIыкIуи ашъхьэ раубытэным пае зэгъусэхэу еджапIэхэм апэблэгъэ гъогухэу лъэсэу узэрыкIон плъэкIыщтхэм арыкIуагъэх ыкIи чIыпIэ зэфэшъхьафэу ащ иIэхэр зэрагъэпшагъэх.
КIэлэцIыкIухэм гъогум тет тамыгъэ­хэм къарыкIыхэрэр ыкIи нэфрыгъуазэм епхыгъэ шапхъэхэр зэрагъашIэх, гъогум нахь узыфэсакъын фэе чIыпIэу иIэхэр агурагъаIо.
Джащ фэдэу ахэм къафаIуатэ гъогум утет хъумэ чIыпIэу узэрыфэрэм елъытыгъэу узэрэзекIон фаер, апэрапшIэу блэбгъэкIынэу щыт транспортыр ыкIи унаIэ зытетын фэе тамыгъэхэр.
— Ны-тыхэм, кIэлэегъаджэхэм ыкIи кIэлэеджакIохэм джыри зэ тялъэIу гъо­гурыкIоным ишапхъэхэр агъэцэкIэнхэу ыкIи сакъынхэу. Рулым кIэрысхэм закъы­фэтэгъазэ: кIэлэцIыкIухэм икъу фэдизэу узэрэзекIощтыр къагурымыIоу мэхъушъ, ащ ренэу унаIэ тебгъэтын фае, — къы­хагъэщыгъ Къэралыгъо автоинспекцием иIофышIэхэм.