«ЩыIэныгъэм пае инфраструктурэр» зыфиIорэ лъэпкъ проектым ипхырыщын фэшI аштэгъэ федеральнэ проектэу коммунальнэ псэуалъэхэм ягъэкIэжьын фэгъэхьыгъэм къыдыхэлъытагъэу псы къабзэу цIыфхэр зашъохэрэм икъычIэщыпIэхэм, икIуапIэхэм ягъэкIэжьын республикэм щырагъэжьагъ.

АР-м и ЛIышъхьэу КъумпIыл Мурат интернет нэкIубгъохэм ащыщ къызэрэщитхыгъэмкIэ, ащ епхыгъэу Iофтхьэбзэ 17 мы илъэсымкIэ агъэнэфагъ. Ахэм пстэумкIи сомэ миллион 223,4-рэ апэIухьащт.
Адыгеим икъэлэ шъхьаIэ чIыпIэ 14-мэ псым икIуапIэу ащызэблахъущтхэр ахэм ащыщых. Километри 9,2-рэ ар зэкIэмкIи мэхъу. Ащ нэмыкIэу, Шэуджэн районымкIэ Дукмасовскэ псэупIэ коим псыкъычIэщыпIэ щырагъэжьагъ, Джэджэ районымкIэ Дондуковскэ коим псым икIуапIэхэр щагъэпсых.
Джащ фэдэу инфраструктурэм пае бюджетым къыхэхыгъэ мылъкумкIэ псым епхыгъэ псэуалъэхэр Мыекъуапэрэ Тэхъутэмыкъое районымрэ ащашIынхэу е ащагъэцэкIэжьынхэу агъэнэфагъ. Ахэри мы илъэсым рагъэжьэщтых.
«Псым, гъэстыныпхъэ шхъуантIэм ыкIи электричествэм алъэныкъокIэ кIуа­чIэу тищыкIагъэр икъу фэдизэу тиIэмэ, псэупIэхэмкIэ проектэу ­етхьыжьэрэр зэкIэ пхырытщын, хъыз­мэтшIапIэхэр, социальнэ псэуалъэхэр дгъэуцунхэ тлъэ­кIыщт. Арышъ, ком­мунальнэ псэуалъэхэр игъорыгъоу гъэкIэжьыгъэнхэм пае федеральнэ IэпыIэгъур хэзыгъэ имыIэу дгъэфедэным, тэ амалэу тиIэри хэтлъхьа­ным тыпылъ. ЦIыфэу республикэм щыпсэухэрэм шапхъэхэм адиштэрэ фэIо-фашIэхэр къызIэкIагъэхьашъунхэми ар фэIорышIэщт» — къытхыгъ респуб­ликэм ипащэ.