Гъогу километрэ 40-м ехъу агъэкIэжьыщт
«ЩыIэныгъэм пае инфраструктурэр» зыфиIорэ лъэпкъ проектым къыдылъытагъэу кIэлэцIыкIу IыгъыпIэхэм, еджапIэхэм якIуалIэу гъогу километрэ 44,4-рэ 2025-рэ илъэсым Адыгеим щагъэцэкIэжьыщт. Ахэм сомэ миллион 900 апэIуагъэхьащт.
АР-м и ЛIышъхьэу КъумпIыл Мурат гъогу инфраструктурэм изегъэушъомбгъун лъэшэу анаIэ зэрэтетыр мызэу, мытIоу къыхигъэщыгъ.
КъэкIощт 2026-рэ илъэсымкIэ агъэнэфэгъагъэхэм ащыщэу Мыекъуапэ иурамэу Гоголым ыцIэ зыхьырэм иIахьэу метрэ 900 мыгъэ агъэкIэжьыгъ. Ар Адыгэ къэралыгъо университетым ыкIи Мыекъопэ къэралыгъо технологическэ университетым якIуалIэ.
Джащ фэдэу урамэу я 2-рэ Крестьянскэм игъогоу Адыгэ къэралыгъо университетым игуманитар-техническэ колледж екIурэр, урамэу Гагариным ыцIэ зыхьырэм щыщ метрэ 680-у Мыекъопэ гимназиеу N 5-мрэ кIэлэегъэджэ колледжэу Хъ. Андырхъуаем ыцIэ зыхьырэмрэ якIурэр агъэкIэжьыгъэх.
Поселкэу Яблоновскэм кIэлэцIыкIу IыгъыпIэу адэтхэм узэрякIолIэщт гъогухэри мыгъэ къыдалъытагъэх. Ащ иурамэу Свободэм метрэ 700 щагъэцэкIэжьыщт. Ар IыгъыпIэм, гурыт ыкIи кIэлэцIыкIу спорт еджапIэхэм якIуалIэ.
Гъогухэм асфальтыр зэращызэблахъущтым имызакъоу, лъэсрыкIо гъогухэр ащагъэкIэжьыщтых, зимыIэм фашIыщт, ощх-осыпсыхэр зэрыкIощтхэр агъэпсыщтых, урамхэр къэзыгъэнэфыхэрэр зэблахъущтых, тамыгъэхэр агъэуцущтых, зыщищыкIагъэм щагъэтхъыщтых.
«Социальнэ мэхьанэ зиIэ автомобиль гъогухэм республикэм ынаIэ лъэшэу атет. Мы илъэсым пыкIыгъэ уахътэм еджапIэхэм, кIэлэцIыкIу IыгъыпIэхэм якIурэ, шъолъыр мэхьанэ зиIэ гъогу Iахь 15 гъэцэкIэжьыгъэ хъугъэ. Ар километрэ 42-рэ фэдиз. Ахэм анахь кIыхьэхэр Мыекъуапэ икIэу гъунэгъу краим истаницэу Зеленчукскэм кIорэм щыщэу Кощхьэблэ районыр зэпызычырэмрэ Мыекъопэ районымкIэ поселкэу Краснооктябрьскэм икIэу станицэу Дагестанскэм кIорэм щыщ Iахьымрэ. ТIуми гъэсэныгъэм иучреждениехэм уаращалIэ», — къыIуагъ «Адыгеяавтодорым» автомобиль гъогухэмрэ лъэмыджхэмрэ ягъэфедэнкIэ ыкIи якъызэтегъэнэнкIэ иотдел ипащэу Дмитрий Бороненкэм.
«ЩыIэныгъэм пае инфраструктурэр» зыфиIорэ лъэпкъ проектым къыдыхэлъытагъэу пстэумкIи гъогу километрэ 76-м ехъу Адыгеим мы илъэсым щагъэцэкIэжьыщт.
ХЪУТ Нэфсэт.