Кушъхьэфэчъэ спортымкIэ зэнэкъокъоу «Темыр Кавказым щыпсэурэ лъэпкъхэм язэкъошныгъ» зыфиIорэм изичэзыу едзыгъо Адыгеим испортсмен хагъэунэфыкIырэ чIыпIэ къыщыдихыгъ. Километри 148-м ехъу зэрылъ гъогууанэр спортсменхэм къызэранэкIыгъ.

Къалэу Прохладнэм щыкIогъэ уцугъор Къэбэртэе-Бэлъкъарым иадмиралиплIымэ яшIэжь фэгъэ­хьыгъагъ. Зэнэкъокъур рамыгъа­жьэзэ ащ хэлажьэхэрэр адмиралэу Арсений Головко исаугъэт екIолIагъэх, ащ ишIэжь агъэлъэпIагъ, къэгъагъэхэр кIэралъхьагъэх.
НыбжьыкIэхэм язэнэкъокъу хэлэжьагъ ыкIи ятIонэрэ чIыпIэр къыщыдихыгъ Мыекъуапэ илIыкIоу Вадим Ларичевым. Ар текIоныгъэр къыдэзыхыгъэ Павел Продченкэм (Санкт-Петербург) тIэкIу дэдэкIэ ыуж къинагъ. Ящэнэрэ хъугъэ Москва къэзыгъэлъэгъогъэ Максим Тугбаевыр.
Хъулъфыгъэхэм язэнэкъокъу ащытекIуагъ Владимир Гороховик (Беларусь, «Минск»), ятIонэрэ чIыпIэр фагъэшъошагъ Михаил Вьюношевым, джэрз медаль къы­хьыгъ Артур Ершовым («Solomon CycIing Team»).
Мы едзыгъом ыуж зэнэкъо­къум пэрытныгъэр щиIыгъ Даниил Мальцевым («Мангазея – Мос­ковскэ спорт»). Непэ къалэу Владикавказ зичэзыу уцугъор щырагъэжьэщт, гъогууанэм километри 130-рэ илъыщт.