Адыгеим и ЛIышъхьэу КъумпIыл Мурат Къэрэщэе-Черкесым имуфтиеу Эркъен Мухьамэдрэ Адыгеимрэ Пшызэ шъолъырырэ ямуфтиеу Къэрдэнэ Аскэрбыйрэ республикэм и Правительствэ зычIэт унэм зэIукIэгъу щадыриIагъ.

ЗэIукIэгъум илъэхъан динымкIэ ыкIи культурэм ылъэныкъокIэ шъолъырхэм зэдэлэжьэныгъэу зэдыряIэр лъыгъэкIотэгъэным епхыгъэ Iофыгъохэм атегущыIагъэх. Урысыем, Темыр Кавказым ащып­сэурэ быслъымэнхэм яобщественнэ организациехэм пхыращырэ проектхэм кIэухышIухэр къызэратырэр зэIукIэгъум хэлэжьагъэхэм къыхагъэщыгъ.
«Зэкъош шъолъырхэм ялIыкIохэр хьэкIапIэ тадэжь къэкIуагъэхэу тлъэгъунхэр сыдигъуи лъэшэу тигуап. БэмышIэу Къэрэщэе-Черкесым республикэм и Мафэрэ къалэу Черкесскэ за­гъэпсыгъэр илъэс 200 зэрэхъу­гъэмрэ щыхагъэунэфыкIыгъ. Рес­публикэм щыпсэурэ лъэпкъхэм ягъэхъагъэхэм тагъэгушIо, тишъолъырхэмрэ хэгъэ­гумрэ апае IофышIоу ешъу­хьыжьэрэ пстэумкIи къыжъудедгъэштэным сыдигъуи тыфэхьазыр», — къыIуагъ КъумпIыл Мурат.
Эркъен Мухьамэд фабэу къазэрапэгъокIыгъэхэм фэшI зэрафэразэр, Адыгеимрэ Къэрэщэе-Черкесымрэ язэдэлэжьэныгъэ тапэкIи зэрэлъагъэкIотэщтым ицыхьэ зэрэтелъыр къыIуагъ. КъЧР-м имуфтий зэрилъытэрэмкIэ, шъолъырхэмрэ хэбзэ къулыкъухэмрэ япащэхэм ямызакъоу, дин общественнэ организациехэми язэпхыныгъэ нахь агъэпытэн фае.
«ЗыкIыныгъэр, гъэпсын IофшIэныр, IофышIухэр ары нахь лъэш тызышIырэр. Тизэдэлэжьэныгъэ зызщиушъомбгъущт лъэныкъо­хэм талъыхъуным сыдигъуи тыфэхьазыр», — къыIуагъ Эркъен Мухьамэд.
Къэрдэнэ Аскэрбый зэIукIэгъум зэрэщыхигъэунэфыкIыгъэмкIэ, Къэрэщэе-Черкесымрэ Адыгеимрэ я ДиндэлэжьапIэхэм язэпхыныгъэ игъэпытэнкIэ зытегущыIэщт­хэр агъэнэфагъэх. Ислъамым къыдилъы­тэрэ хабзэхэм Урысыем къащыдырагъэ­штэным, хэгъэгум иофициальнэ конфессие пстэуми ялIыкIохэм зэпхыныгъэ адыряIэным ар афэгъэхьыгъ.
«ЗэщыгъэкъокIо кIуачIэхэм обществэр зэрапэуцужьырэмкIэ IэпыIэгъу тафэхъуным, терроризмэмрэ экстремизмэмрэ агу фэмыштэу ныбжьыкIэхэр пIу­гъэнхэм тишъыпкъэу тапылъ. Тиимамхэр Iэнэ хъураехэм ахэлажьэх, ныбжьыкIэхэм Iоф адашIэ», — къыIуагъ Къэрдэнэ Аскэрбый.
ЗэIукIэгъум икIэух КъумпIыл Мурат къыхигъэщыгъ шъолъырхэмрэ ислъам динымрэ япащэхэм язэдэлэжьэныгъэ мэхьанэшхо зэриIэр. Адыгеим и ЛIышъхьэ зэрилъытэрэмкIэ, экономикэм, социальнэ лъэныкъом, бизнесым зягъэ­ушъомбгъугъэнымкIэ, общественнэ рэхьатныгъэр къэухъумэгъэнымкIэ ар ищыкIэгъэ дэдэу щыт.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.