Аужырэ уахътэм бэрэ зигугъу тшIыгъэ мафэр къэсыгъ. Адыгэ къуаем ия 14-рэ фестиваль Мыекъопэ районым и Дахъо гъэхъунэ непэ щаублагъ.

Ыпэрэ мафэм пчыхьэ кIасэм нэс районхэм ялIыкIохэу ащ хэлажьэхэрэм загъэхьазырыгъ. Къэнагъэ щыIэмэ пчэдыжьым жьэу зэлъыкIагъэхьажьыгъ. Ыуж зыми зыкъыригъэнэнэу фаеп. Район пэпчъ ищагу гъэлъэгъуапIэ блэкIыгъэ илъэсым нахьи нахь дахэу, гъэшIэгъонэу зэришIыщтым дэлэжьагъ. Мыекъопэ районым игъэлъэгъуапIэ екIурэ лъагъо­хэр хьакIэхэм афэбгъузэ хъункIэ енэгуягъо. Адыгэ къое гъэгъугъэшхоу ашIыгъэм дэжь пстэури плъапIэ кIощт. МэфэкIыр зыщырекIокIырэ район-бысымыр къэмыукIытэжьыным амалэу иIэр зэкIэ рихьылIагъ.

— Шъыпкъэр пIощтмэ, ыпэрэ мэфэкIыр зытыухырэм къыщегъэжьагъэу къэкIощтым тегупшысэу етэгъажьэ. Мыгъэ тищагу адыгэ къое гъэгъугъэм фэдэу тшIынэу район пащэм дэжь тызыщызэхэгущыIэжьым зэдэтштагъ. Ар гъэцэкIагъэ зэрэхъущтыр къэшIэгъоягъэми къыддэхъугъ. Мыр дэхэфэшI къуай, ау пшхымэ хъущтхэри, хьалыжъохэри тиIэщтых. Арышъ, зэкIэри къетэгъэблагъэ, — къыIуагъ Мыекъопэ районым культурэмкIэ игъэIорышIапIэ ипащэу Дмитрий Губерт.
Къое шъуашэ зиIэу гъэпсыгъэ гъэлъэ­гъуапIэм метрий икIыхьагъ. ПсэолъэшI тхъурбэу литрэ 90-рэ мэфитIурэ тыраут­хагъ, агъэлэжьыгъ. Тхыпхъэу хэлъхэри къуаем исурэтхэм афэдэным егугъугъэх ыкIи къадэхъугъ. Ухэцэкъэным утыригъэгушIухьэу, шъыпкъэм фэдэу къэлъагъо.

Район пэпчъ игъэлъэгъуапIэ егугъугъ. Адыгэкъалэхэм ящагу ишIынкIэ, гущыIэм пае, Бырсыр Абдулахь исурэтхэу мэфэпчъым итхэм арыгъозагъэх. Илъэсым илъэхъаниплI къыщагъэлъэгъуагъ. ЧIэхьапIэм зэкIэми бжыхьэр къащыпэгъокIы. Адырэ лъэхъанхэр щагу кIоцIым щызэбгырыдзыгъэх. Ахэр гъэшIэгъонэу къыра­гъэлъэгъукIыгъэх. Ау пстэури зы зы­шIыжьхэрэр — IэкIэ шэкIым тырашIыхьэгъэ адыгэ тхыпхъэхэу кIашъори, бгъагъэ Iупэхэри къэзыгъэдэхэщтхэр ары.
Арышъ, непи неущи адыгэ къуаем имэфэкI кIощтхэм гъэшIэгъоныбэр, адыгэ шхын IэшIухэр къащяжэщтых. МэфитIу мэфэкIым къыдыхэлъытагъэу джэгукIэ, зэнэкъокъу зэфэшъхьафхэр рекIокIыщтых. Къое, хьалыжъо анахь IэшIухэр, зищагу гъэлъэгъуапIэ нахь дахэр къыхахыщтых.
Шъугу къэдгъэкIыжьын, Адыгеим ирайонхэмрэ икъалэхэмрэ афэшъхьафэу, Пшызэ шъолъырым ирайонитIу апэрэу мыщ хэлэжьэщтых.
МэфэкIым еблагъэ зышIоигъоу, ау зэрыкIощтыр зымышIэхэрэми фестивалым изэхэщакIохэр афэгумэкIыгъэх. МэфитIум къыкIоцI, Iоныгъом и 13 — 14-м, «Мыекъуапэ — Дахъо гъэхъунэр» ыкIи «Дахъо гъэхъунэр — Мыекъуапэ» зыфиIорэ гъогууанэм автобус 12-мэ Iоф щашIэщт. Мыекъуапэ иурамэу Шоссейнэм тет уцупIэу «Восходым» мафэм сыхьатыр 12-м ыныкъом ахэр IукIыщтых. Мафэм сыхьатыр 2-м къыщегъэжьагъэу пчыхьэм 7-м нэс Дахъо гъэхъунэм къы­ращыжьыщтых.
Анцокъо Ирин.