ПсырыкIуапIэхэр агъэкIэжьых
Километри 9,2-рэ зикIыхьэгъэ псырыкIуапIэхэм ячIыпIэ 14 мыгъэ Мыекъуапэ щагъэцэкIэжьынэу рахъухьэ. Лъэпкъ проектэу «ЩыIэныгъэм пае инфраструктурэм» ифедеральнэ проектэу «Коммунальнэ инфраструктурэр джырэ уахътэм диштэу зэтегъэпсыхьэгъэныр» зыфиIорэм тетэу гъэцэкIэжьын IофшIэнхэр зэхащэх. Ащ пае сомэ миллиони 122,3-рэ къатIупщыгъ.
Подрядчикэу «ЭнергоСтройКомплексым» чIыпIи 9-мэ: переулкэу Профсоюзнэм, къутырэу Северо-Восточные Сады иурамэу Автотранспортнэм, В. Высоцкэм имикрорайон, Ушинскэм, Калининым, Кольцовым, Тургеневым яурамхэри, урамхэу Батарейнэм, Восточнэм псырыкIуапIэхэр ащигъэцэкIэжьынхэу ыублагъ. Мы мэфэ благъэхэм адрэ чIыпIи 5-ми IофшIэнхэр ащырагъэжьэщтых.
Федеральнэ проектэу «Коммунальнэ инфраструктурэр джырэ уахътэм диштэу зэтегъэпсыхьэгъэныр» зыфиIорэм тетэу сомэ миллион 223,4-рэ зытефэщт Iофтхьэбзэ 17 республикэм щызэрахьэ. Мыекъуапэ ипсырыкIуапIэхэр зэрагъэкIэжьхэрэм нэмыкIэу Дукмасовскэ къоджэ псэупIэм псыIыгъыпIэхэр, Дондуковскэ къоджэ псэупIэм псырыкIуапIэ ащагъэпсы.
Инфраструктурэ бюджет чIыфэхэм яшIуагъэкIэ псыр аIэкIэзгъэхьащт ыкIи Iузыщыщт псэолъэ заулэ къалэу Мыекъуапэрэ Тэхъутэмыкъое районымрэ ащагъэцэкIэжьынэу ыкIи ащагъэпсынэу рахъухьэ. Ащ фэдэ IофшIэнхэр мыгъэ рагъэжьэщтых. Ащ пае сомэ миллиони 185-рэ хъурэ апэрэ траншыр республикэм къыфыхэгъэкIыгъэным къыдырагъэштагъ.
«Коммунальнэ инфраструктурэ дэгъур чIыпIэхэм хэхъоныгъэ ашIынымкIэ лъэпсэшIоу щыт. ПсымкIэ, газымкIэ, электроэнергиемкIэ тищыкIагъэм фэдиз амалхэр тиIэ зыхъукIэ ары ныIэп псэупIэхэм япхыгъэ проектхэр дгъэцэкIэнхэ, предприятиякIэхэр, социальнэ псэуалъэхэр дгъэпсынхэ зытлъэкIыщтыр. Коммунальнэ хъытыухэр чэзыу-чэзыоу гъэцэкIэжьыгъэнхэм пае федеральнэ IэпыIэгъоу къытатырэри, тэ амалэу тиIэхэри икъоу тэгъэфедэх. Ащ епхыгъэу цIыфхэм ящыIэкIэ-псэукIэ нахь зыкъиIэтыщт, фэIо-фашIэхэри нахьышIоу афагъэцэкIэщтых. ЦIыфхэм яфэныкъоныгъэхэм адиштэу яIофшIэн зэхащэнэу АР-м псэолъэшIынымкIэ и Министерствэ илIыкIохэми, чIыпIэхэм япащэхэми пшъэрылъ афэзгъэуцугъ», — къыIуагъ Адыгеим и ЛIышъхьэу КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.