Джэджэ районым ит псэупIэу Сергиевскэм дэс Волошинхэр «Илъэсым иунагъу» зыфиIорэ зэнэкъокъум хэлэжьагъэх ыкIи «Сабыибэ зэрыс унагъор» зыцIэ лъэныкъомкIэ текIоныгъэр къыдахыгъ.

Адыгеим и ЛIышъхьэу КъумпIыл Мурат унагъом фэгушIуагъ. Илъэси 10 хъугъэу зэхащэрэ зэнэкъокъоу унэгъо мини 4-м ехъу зыхэлэжьагъэм Волошинхэм текIоныгъэ къызэрэщыдахы­гъэм мэхьанэшхо иIэу къыхигъэщыгъ. Унэгъо пытэр хэгъэгум зэрилъапсэр хигъэу­нэфыкIыгъ.
Сабыибэ зэрыс унэгъо зэгурыIожьым къэралыгъом икъэлэ шъхьаIэ кIонэу зызэрэфигъэхьазырырэр зэдгъэшIэнэу теблэгъагъ.
Волошин зэшъхьэгъусэхэр зызэдэпсэухэрэр илъэс 37-рэ хъугъэ, сабыи 4 зэдапIугъ, ахэм къакIэхъухьэгъэ пхъо­рэлъ­фи 5 яI.
Унагъом ышъхьэу Василий исэнэхьаткIэ ветеринар, мэкъумэщ хъызмэтым щэлажьэ, иунэе фермэ къызэIуихыгъэу былымышъхьэ 60 фэдиз щиIыгъ. Светланэ медицинэ сэнэхьатым илъэс 20-рэ рылэжьагъ. Джы цIыфхэм социальнэ фэIо-фашIэхэр защыфагъэцэкIэрэ гупчэу псэупIэу Сергиевскэм дэтым ипащ.

— Насыпыр — гушIуагъо, тхъа­гъо, тынчыныгъ, зэфагъ, къэбзагъ, фэбагъ, шъыпкъагъ, лъытэныгъ, гукIэгъу ин, рызыкъ, сабый щхы макъ, псауныгъ ыкIи мамырныгъ. Мы къэспчъыгъэхэр къызпыкIырэр кIэлэцIыкIухэр ары. Унагъор ары цIыфыр насыпышIо зышIырэр. Си­шъхьэгъусэ къызготэу илъэс 37-м гушIуагъуи гукъауи зэдэдгощыгъ.. ШIулъэгъум дакIоу лъытэныгъи зэфэпшIыжьын фае. Джа зэкIэри зызэбгъэкIукIэ, лъэп­сэ пытэ зиIэ унагъо бгъэпсы­шъущт, — къеIуа­тэ Светланэ.
Сыд фэдэрэ лъэхъани унагъом имэхьанэ зэхъо­кIырэп. ЛIэуж зэфэшъхьафхэр зэрипхыхэзэ, къэралыгъом ипытапIэу щыт.
— СигущыIэ мэхьанэ иIэным, шъхьэкIафэ зэфэтшIыжьэу тыпсэуным сыпылъ. Лъытэныгъэр — унагъом ылъапс. Ным унагъомкIэ ыпшъэ ифэрэ Iоф­шIэныр нахьыбэми, тыр ащ ыуж къимынэу къысщэхъу. Былымхъуным илъэсыбэ хъугъэу сыпылъ. Сишъхьэгъусэрэ сибынрэ къыздемыIагъэхэмэ гъэ­хъэгъэшхо сфэшIыщтыгъэп. Унагъом исхэм IофшIэныр якIас, — еIо унагъом ышъхьэ.
Япшъэшъэ на­хьы­жъэу Наталье илъэс 36-рэ ыныбжь, пшъэ­дэкIыжьэу ыхьырэмкIэ гъунэпкъэ гъэнэ­фа­гъэ зиIэ обществэу Краснодарагроальянсым» юристэу щэлажьэ. Ащ къыкIэлъы­кIорэ Аннэ илъэс 31-рэ ыныбжь, псэупIэу Сергиевскэм иадминистрацие спе­циалист шъхьаIэу щэлажьэ. ЯкIалэхэу Иванрэ Ильярэ ятэ илъэуж техьагъэх, Дондуковскэ мэкъу­мэщ техникумым щеджэх. Былымхъуныр мылъку къэкIуапIэу алъытэ, унэгъо хъызмэтым зырагъэ­ушъомбгъуным пы­лъых. Мэкъумэщ хъыз­мэтым хэхъоныгъэ егъэшIыгъэным фытегъэпсыхьэгъэ программэу «Унэгъо фермэр» зыфиIорэм мыгъэ хэлажьэх. Былымхъуным зырагъэушъомбгъуным пае грант къаратыным ежэх.
Бысымгуащэм къызэриIуагъэмкIэ, унагъом шэн-хэбзэ гъэнэфагъэхэр зэрехьэх. ИлъэсыкIэм зэрэунагъоу зэрэугъои. Наталье ятэу илъэс 81-рэ зыныбжьым дэжь макIох.
ТигущыIэгъу бысымгощэ хъупхъ, пщэрыхьаныр икIас, хьакIэхэм ищы­гъу-пIастэ апегъохы. Зы мэфэкI бламыгъэ­кIэу унагъом исхэр зэрэугъоих.
— ТыныбжьыкIэ дэдэу щыIэныгъэм тызэфихьыгъ. Илъэс зэкIэ­лъыкIохэм гумэкIыгъоу такъикъ гушIуагъоу тапэ къикIыгъэр бэ, ау сыдигъуи тызэдэIужьыгъ, тызэгурыIуагъ. ШъхьэкIэфыны- гъэ зэфытиIэу тызэдэпсэугъ. Зым игупшысэ адрэм зэхихыныр, ар къызэрэддэхъущтым тызэ­гъусэу тыфэкIоныр тишэныгъ. Амалэу тиIэмкIэ тызэдеIэжьы, тиунагъо хахъо зэришIыщтым тыпылъ. Тиджэныкъо машIо зэрымыкIосэщтым сыпылъ. Унагъом исхэм гуфэбэныгъэ зэфыряIэным мэхьанэшхо есэты. Iоф зэхэдз ямыIэу тилъфыгъэхэр зэдеIэжьынхэр сиунэшъо пытэу щыт, — еIо бысымгуащэм.

Зэшъхьэгъусэхэм рэхьатныгъэ азыфагу илъэу зэдэпсэух. Лъэпсэ пытэ зиIэ унагъо бгъэпсынымкIэ анахь мэхьанэ зиIэмкIэ ахэм тяупчIыгъ.
— ШъхьэкIафэ зэфэпшIын, гукIэгъу пхэлъын фае. Зэфэгъэ­кIуатэ уимыIэмэ къиныгъохэр зэпыпчынхэ плъэкIыщтэп. Хъулъ­фыгъэм иунашъо — пытэу, бзылъфыгъэм иIэдэб дэхэмэ, унагъор пытэщт, — къы­Iуагъ Светланэ.
Зэнэкъокъум хэлэжьэнхэу зэрэхъу­гъэм тыкIэупчIагъ.
— «Сабыибэ зэрыс унагъор» зыфиIорэ лъэныкъомкIэ шъолъыр зэнэкъокъум тыхэлэжьэнэу зыкъытфэзгъэзагъэр «Унэгъо лъэныкъуабэ къызэлъызыубытырэ гупч» зыфиIорэм икъутамэ ипащэу Лариса Жуковар ары. ТызэхэгущыIэжьхи, мазэм зыдгъэхьазырыгъ, видеоролик тетхыгъ, нэпэеплъ сурэтхэр зэхэд­гъэуцуагъэх. Ащ фэдиз унагъо­хэм такъызэрэхагъэщыгъэм лъэшэу тигъэгушIуагъ. Мы бжыхьэ Москва тыкIонэу тырагъэблэ­гъагъ, — еIо Светланэ.
— Унэгъо зэфыщытыкIэхэр гъэпытэгъэнхэм мэхьанэшхо зэриIэр къыдгу­рэIо. Тинахьыжъ тэгъэлъапIэ, зэгурыIоныгъэ тазыфагу илъэу тянэрэ тятэрэ тапIугъ, ахэр тищысэтехыпIэх. Сыд фэдэ мэфэкI тиIэми, тызэхахьэ. Тизыгъэпсэфыгъо уахътэ, хабзэ зэрытфэхъугъэу, зекIо тэкIо, къушъхьэхэр, хыр тикIасэх, Урысыем ичIыпIэ дахэхэр зэтэгъэлъэгъух, — къыIуагъ япшъашъэу Наталье.
КIэлэцIыкIухэм япIун Волошиным яунагъо кIочIэшхо пэIуегъахьэ. ЕджэнымкIэ, спортымкIэ, творчествэмкIэ гъэхъагъэхэр ашIынхэм пылъых, унэгъо, лъэпкъ хабзэхэр къаухъумэх. Тикъэралыгъо фэшъыпкъэхэу, ар къаухъумэным фэхьазырынхэм фагъасэх. ЯкIалэхэу Иванрэ Ильярэ бжыхьэм дзэ къулыкъум кIонхэу загъэхьазыры. Нымрэ тымрэ гумэкI шъэфхэр зыдаIыгъых. СыдигъокIи цIыф зэфыщытыкIэ дахэхэм, зэгурыIоныгъэм, гукIэгъуныгъэм ыкIи зэфагъэм осэ ин зэряIэр япхъорэлъфхэм араIо.
Волошинхэм яунагъо Москва кIонэу зегъэхьазырышъ, гъогу мафэ шъутехь етэIо.
Лъэпшъыкъо
Фатим.