ТидзэкIолIхэм тарэгушхо
Я 227-рэ Краснознаменнэ артиллерийскэ бригадэу Адыгеим щыIэм ипшъэрылъхэр хэушъхьафыкIыгъэ дзэ операцием щегъэцакIэх. ТидзэкIолIхэм Хэгъэгур къагъэгъунэзэ лIыгъэу ыкIи псэемыблэжьныгъэу зэрахьэрэм апае Урысыем и Президентэу Владимир Путиным и УказкIэ бригадэм дзэ щытхъуцIэу «гвардейскэр» бэмышIэу къыфагъэшъошагъ.
Телеканалэу «Россия 1-м» я 227-рэ Краснознаменнэ артиллерийскэ бригадэр зэуапIэм зэрэIутым фэгъэхьыгъэ репортаж джырэблагъэ къыгъэлъэгъуагъ.
— Урысыем ишъхьафитыныгъэ къаухъумэзэ тидзэкIолIхэу хэушъхьафыкIыгъэ дзэ операцием хэлажьэхэрэм тарэгушхо. Тидунай тапэкIэ мамырыным ахэр псэемыблэжьэу фэбанэх. Ахэр – лIыхъужъ шъыпкъэх! РеспубликэмкIэ анахь шъуашэр ыкIи тызэрыгушхорэр — артиллерийскэ бригадэм хэтэу Советскэ Союзым и ЛIыхъужъэу Андырхъое Хъусен ыцIэ зыхьырэ артиллерийскэ дивизионэу тичIыгогъухэр зыхахьэрэр зэуапIэм зэрэIутыр ары, — къащитхыгъ ихъытыу нэкIубгъохэм АР-м и ЛIышъхьэу КъумпIыл Мурат.
Телеканалэу «Россия 1-м» идзэ корреспондентэу Леонид Муравьевымрэ телеоператорэу Андрей Потаповымрэ зэуапIэм репортажыр къыщагъэхьазырыгъ. Механикэу, псэолъэшIэу лажьэщтыгъэ кIалэхэр джы артиллеристхэу хэушъхьафыкIыгъэ дзэ операцием зэрэхэлажьэхэрэр, дзэкIолIхэм япшъэрылъхэр зэрагъэцакIэрэр репортажым къыщаIотагъ ыкIи къыщагъэлъэгъуагъ. ЗэкIэмкIи такъикъищырэ ныкъорэ кIорэ видеоматериалым пыим пэуцужьырэ тидзэкIолIхэм сэнаущыгъэ ин ахэлъэу, фэгъэсагъэхэу япшъэрылъхэр зэрэзэшIуахырэр журналистым къыщыриIотыкIыгъ. ХэушъхьафыкIыгъэ дзэ операциер аухыфэ тилIыхъужъхэр къызэкIэмыкIохэу къулыкъу зэрахьыщтыр репортажым къыщаIуагъ. ЛIыхъужъныгъэ иным ищысэтехыпIэхэу джырэ тарихъым ахэр хэхьащтых.