Унэ 29-рэ Адыгеим щатхыгъ
2025-рэ илъэсым пыкIыгъэ мэзи 8-р пштэмэ, Росреестрэм и ГъэIорышIапIэу АР-м щыIэм фэтэрыбэу зэхэт унэ 29-рэ кIэу республикэм щашIыгъэу, ар квадрат метрэ 78667,1-рэ мэхъу, кадастрэ учетым хигъэуцуагъ. Ащ щыщэу 11-р Мыекъуап зыщагъэуцугъэр, ар квадрат метрэ 22036,2-рэ зэрэхъурэр.
«Фэтэрыбэу зэхэт унэхэм социальнэ мэхьанэ яI, арышъ, ахэм ятхын анахьэу тынаIэ тет, охътэ кIэкIым тхылъхэр гъэпсыгъэнхэм тыпылъ», — къыIуагъ Росреестрэм и ГъэIорышIапIэу АР-м щыIэм ипащэ иIэнатIэ зыгъэцакIэгорэ ЕмыкI Марыет.
Шъугу къэдгъэкIыжьын, 2025-рэ илъэсым игъэтхапэ и 1-м къыщыублагъэу цIыфхэм яахъщэ зэхалъхьэзэ ашIыгъэ псэуалъэр «дольщикхэм» заратыжьырэ ыкIи кадастрэ учетым зыхагъэуцорэ ужым, псэолъэшIым унэр къэралыгъо регистрацие зышIыщт къулыкъум электроннэ шIыкIэм тетэу тхылъхэр фигъахьынхэ фае.
Зиахъщэ хэзылъхьагъэхэм унэр зэраритыжьырэр къэзыушыхьатырэ тхылъым зызэдыкIэтхагъэхэм ыуж мэфэ 30 нахьыбэ темышIэу ар ыгъэцэкIэнэу хэбзэгъэуцугъэм къыщеIо. ПсэолъэшIым ар Iэпэдэлэл ышIыгъэмэ, зиIахь хэзылъхьи фэтэрыр язгъэшIыгъэм ежь-ежьырэу тхылъхэр Росреестрэм IэкIигъэхьанхэ фит.
Къэралыгъо ыкIи муниципальнэ фэIо-фашIэхэр зыщагъэцакIэхэрэ Гупчэм екIуалIэмэ ахэр ытынхэ ылъэкIыщт. Мы илъэсым игъэтхапэ и 1-м нэс актым зэдыкIэтхагъэхэмэ, тхьапэм тетхэми хъущт. Джащ фэдэу къэралыгъо фэIо-фашIэхэм япортал е Росреестрэм иинтернет нэкIубгъо ащитыни ылъэкIыщт.