Кушъхьэфэчъэ спортымкIэ зэнэкъокъоу «Темыр Кавказым щыпсэурэ лъэпкъхэм язэкъошныгъ» зыфиIорэм иедзыгъоу Къэрэщэе-Черкес Республикэм игъогухэм ащыкIуагъэм спортым имастерэу, Адыгеир къэзыгъэлъэгъорэ СтIашъу Мамыр текIоныгъэр къыщыдихыгъ.

Яенэрэ уцугъор Архыз къыщырагъажьи Черкесскэ щаухыгъ. Зэнэкъокъум иедзыгъо икIэух зыщызэхащэгъэ Усть-Джигутинскэ районым кушъхьэфэчъэ спортыр зыгу рихьыхэрэр ыкIи мы чIыпIэм щыпсэухэрэр къыщызэрэугъоигъэх, ахэр спортсменхэм апэгъокIыгъэх. Километри 120-рэ зэрылъ гъогууанэр анахь псынкIэу къызэзынэкIыгъэр СтIашъу Мамыр.
— Къэрэщэе-Черкес Республикэм щыкIогъэ едзыгъом текIоныгъэр къызэрэщыдэсхыгъэм лъэшэу сигъэгушIуагъ. Ау Мые­къуа­пэ щызэхащэгъэ уцугъом ха­гъэунэфыкIырэ чIыпIэ къыщыс­хьын зэрэсымылъэкIыгъэр сыгу къеуагъ, — къыIуагъ Мамыр.

ЯтIонэрэ чIыпIэр ыубытыгъ зэнэкъокъум пэрытныгъэ щызы­Iыгъ Савва Новиковым (командэу «Мангазея – Московскэ спорт»). Ящэнэрэ хъугъэ Республикэу Беларусь илIыкIоу Евгений Королек.
КъыкIэлъыкIорэ ябгъонэрэ едзыгъор непэ Къэбэртэе-Бэлъкъар Республикэм щырагъэжьэщт. Спортсменхэм ягъогууанэ шъо­лъы­рым икъэлэ шъхьаIэу Налщык щырагъэжьэнышъ псэупIэу Бе­— зе­н­ги нэсыщт, ащ километри 135-рэ илъыщт. ЗэкIэмкIи зэ­нэ­къо­къум уцугъо 17 къыдыхэлъы­тагъ, Iоныгъом и 21-м финалыр къалэу Грознэм щыкIощт.