Бысымхэр нахь лъэшыгъэх
ГандболымкIэ Урысыем и Суперлигэ хэт «АГУ-Адыифыр» «Астраханочкэм» IукIагъ. Астрахань щыкIогъэ ешIэгъум бысымхэр нахь щылъэшыгъэх, текIоныгъэр къыдахыгъ.
«Астраханочка» — «АГУ— Адыиф» — 34:25 (18:11)
«Астраханочкэм» щешIагъэх: къэлэпчъэIутхэр — Колесниковар, Дегтяревар, Якуповар. Романенкэр — 5, Сотниковар — 5, Юрьевар — 4, Дудинар — 4, Ильинар — 4, Дудкинар — 3, Нефедовар — 3, Климанцевар — 2, Бессалая – 2, Шаповаловар – 1.
«АГУ-Адыифым» хэтыгъэх: къэлэпчъэIутхэр — Черницовар, Гобадзе. Коваленкэр — 6, Смирновар — 6, Миловар — 4, Алексеевар – 3, Коблыр — 2, Кожубековар — 2, Краснокутскаяр — 1, Хавронинар — 1.
«АГУ-Адыифым» лъэш дэдэу фэгумэкIыхэрэр ары текIоныгъэм ежагъэхэр. Бысымхэр хэпшIыкIэу нахь лъэшых, блэкIыгъэ илъэсым итурнир таблицэ изэфэхьысыжьхэми ар къаушыхьаты. Я 20-рэ такъикъым ехъулIэу «Астраханочкэр» 8:3-у тикомандэ къытекIощтыгъ. Ау ащ ыуж хьакIэхэм яешIакIэ агъэлъэшыгъ ыкIи ошIэ— дэмышIэу 9:8-у ыпэ ишъыгъэх. Ау хьакIэхэм ягъэхъагъэхэр ащ щаухыгъ. Никита Голуб ыгъэсэрэ пшъашъэхэм яешIакIэ хэпшIыкIэу къеIыхыгъ, къин дэдэ алъэгъущтыгъ. Мыщ дэжьым бысымхэм къахэщыгъ Елизавета Дудкинар. Апэрэ таймым икIэух ащ дахэу къэлапчъэм Iэгуаор дидзагъ. ЯтIонэрэ едзыгъоми ешIэгъум зэхъокIыныгъэшхо фэхъугъэп, Мыекъуапэ игандболисткэхэм къэлапчъэм Iэгуаор дадзэныр къафэкъиныгъ, бэрэ ар чIанэщтыгъ. Аужырэ такъикъым Дарья Миловам бысымхэм якъэлапчъэ Iэгуаор дидзагъ, пчъагъэр 34:25-у зэIукIэгъур аухыгъ.
Командэхэм яешIэкIо анахь дэгъоу алъытагъэх Варвара Юрьевамрэ («Астраханочкэр») Алена Алексеевамрэ («АГУ-Адыиф»). Мыекъуапэ икомандэ зэIукIэгъуитIу иIагъ, очко къыхьыгъэп ыкIи я 9-рэ чIыпIэм щыт. КъыкIэлъыкIощт ешIэгъур Iоныгъом и 26-м республикэм икъэлэ шъхьаIэ щыриIэщт, «Лучыр» (Москва) тихьакIэщт.