Адыгэ Республикэм и Лъэпкъ музей загъэпсыгъэр мыгъэ илъэси 100 хъущт. ЛIэшIэгъу мэфэкIыр хагъэунэфыкIызэ, республикэм щыпсэухэрэри, ихьакIэхэри адыгэхэм якуль­турэ, яшэн-хабзэхэм, щыIэкIэ-псэукIэу яIагъэм игъэ­кIотыгъэу нэIуасэ афашIыщтых.

Лъэпкъ музеим иколлекцие хэлъ пкъыгъо пэпчъ къэбар гъэшIэгъон пылъ. Музеим иIофышIэхэм егугъузэ ахэр къаугъоигъэх ыкIи лIэшIэгъум къыкIоцI къаухъумагъэх. Ащ ишIуагъэкIэ тэ непэ Адыгеим икультурэ ямышIыкIэ зыщыдгъэгъозэн, тятэжъ пIашъэхэм ягъэхъагъэхэм, илъэсыбэкIэ узэкIэIэбэжьмэ мыщ къыщыхъугъэгъэ хъугъэ-шIагъэхэм нэIуасэ зафэтшIын тэлъэкIы.
Непэ Лъэпкъ музеим мэфэкI къэ­гъэлъэгъонитIу къыщызэIуахыгъ. «Адыгэ Республикэм и Лъэпкъ музей ифондхэм къахэхыгъэ тыжьын пкъыгъохэм яколлекцие» зыфиIорэм хъулъфыгъэ, бзылъфыгъэ бгырыпххэр, бгъэидэхэр, адыгэ шъуашэм щагъэфедэрэ нэмыкI хьап-­щыпхэр щытэлъэгъух. Пкъыгъо пэпчъ нэгъэсыгъэу шIыгъэ, адыгэхэм якультурэ кIэн зэрэбаир ахэм къаушыхьаты.

Къэгъэлъэгъонэу «Экспонатхэм къа­Iуатэ. Этнографическэ экспедициехэм ауж титэу» зыфиIорэм илъэсыбэ хъу­гъэу ушэтын Iофэу музеим зэшIуихыхэрэм нэIуасэ уафешIы. Республикэм ирайон зэфэшъхьафхэм экспедициехэу щызэхащагъэхэм, музей коллекциехэр къэзыугъоигъэ ыкIи научнэ лъапсэ яIэу къэзытхыхьэгъэ этнографхэм ар къа­тегущыIэ. Экспонатхэм азыныкъо на­хьыбэр я 19-рэ лIэшIэгъум ия 2-рэ кIэ­лъэныкъо — я 20-рэ лIэшIэгъум иублэгъу, зырызхэр я 18-рэ лIэшIэгъум ашIыгъагъэх.

«Мы тхьэмэфэ благъэхэм экспозицие гъэшIэгъонитIу джыри къызэIуихынэу музеим зегъэхьазыры. Адыгеим щыпсэухэрэри, ихьакIэхэри Лъэпкъ музееу тишъолъыр икIэн бай зыщыугъоигъэм къесэгъэблагъэх. Къалэу Мые­къуапэ иурамэу Советскэм тет унэу N 229-м ар чIэт» — къащитхыгъ АР-м и ЛIышъхьэу КъумпIыл Мурат ихъытыу нэкIубгъохэм.