Лъэпкъ тхакIоу МэщбэшIэ Ис­хьакъ ыныбжь илъэс 95-рэ зэрэхъугъэм фэгъэ­хьыгъэ поэтическэ Iофтхьабзэ АР-м и Теат­ральнэ зэхахьэ Iоныгъом и 15-м зэхищэщт.

Урысыем IофшIэнымкIэ и ЛIыхъу­жъэу, Адыгэ, Къэбэртэе-Бэлъкъар, Къэрэщэе-Черкес республикэхэм ыкIи Абхъа­зым ялъэпкъ тхакIоу МэщбэшIэ Исхьакъ мыгъэ ныбжь дахэ хигъэунэфыкIыгъ. Ащ итворчествэ адыгэ лъэпкъым ыкIи урысые литературэм чIыпIэ ин ащеубыты, лъэпкъым игушъхьэбаиныгъэ ыкIи итарихъ шIэжь ахэолъагъо. МэщбэшIэ Исхьакъ ипрозэ къыхэхыгъэ пычыгъохэу ыкIи иусэхэу, зэкIэмкIи итхыгъэ 30 фэдиз, пчэгум щагъэIущт.
ТхэкIошхом илитературэ цIыфхэм нахь ягъэшIэгъэныр ыкIи поэзием, лъэпкъ культурэм агухэр къафэгъэущыгъэнхэр Iофтхьабзэм изэхэщакIохэм пшъэрылъ шъхьаIэу зыфалъэгъужьы. ШIоигъоныгъэ зиIэхэр зэкIэ къырагъэблагъэх.
Пушкиным и Унэ къыпэIулъ пчэгум Iоныгъом и 15-м пчыхьэм сыхьатыр 8-м ыныкъом пчыхьэзэхахьэр аублэщт.