Шъолъырхэм хэхъоныгъэ ягъэшIыгъэнымкIэ УФ-м и Правительственнэ комиссие и Президиум изэ­хэсыгъоу Урысыем и Пра­вительствэ и Тхьаматэ игуадзэу Марат Хуснуллиным зэрищагъэм АР-м и ЛIышъхьэу КъумпIыл Мурат хэлэжьагъ.

Къэлэ щыIэкIэ Iэрыфэгъум игъэпсын, джырэ уахътэм диштэу коммунальнэ инфраструктурэр зэтегъэпсыхьэгъэным, зэхэонкIэ щынагъоу щыт унэхэм цIыфхэр къачIэщыжьыгъэнхэм, гъогухэм яшIынрэ ягъэцэкIэжьынрэ, къуа­джэхэм хэхъоныгъэ ягъэ­шIыгъэным япхыгъэ социальнэ Iофыгъохэм зэхэсыгъом щатегущыIагъэх.
Джырэ уахътэм диштэрэ инфраструктурэр къуаджэхэм ­ащыгъэпсыгъэнымкIэ, унэхэм яшIынкIэ, коммунальнэ, гъогу фондхэм ягъэкIэжьынкIэ Iоф гъэ­нэфагъэ Адыгеим щызэшIуахы. Урысыем и Президентэу Вла­димир Путиныр кIэщакIо зыфэ­хъугъэ лъэпкъ проектэу «ЩыIэныгъэм пае инфраструктурэр» зыфиIорэри ащкIэ амалышIоу щыт.
«БэмышIэу хэгъэгум ипащэхэм псырыкIуапIэхэм яшIынкIэ ыкIи ягъэкIэжьынкIэ казначейскэ инфраструктурэ чIыфэхэр къытатынхэмкIэ лъэIу тхылъэу аIэкIэдгъэхьагъэхэм къадыра­гъэштагъ. Ащ епхыгъэу инфраструктурэ проекти 4 пхырытщынэу итэхъухьэ.
Инфраструктурэм изегъэу­шъомбгъункIэ Адыгеим зэхъо­кIыныгъэшIухэр зэрэщыхъугъэ-
хэр тинэрылъэгъу. ЗэхэонкIэ щынэгъо унэхэм цIыфхэр къа­зэрачIащыжьырэм ишIуагъэкIэ фэгъэкIотэныгъэ гъэнэфагъэхэр зиIэхэм, кIэлэцIыкIу ибэхэри ахэм къахиубытэхэу, нахь псын­кIэу унэхэр къараты. Тиреспуб­ликэ гъогукIэхэр щагъэпсых, общественнэ чIыпIэхэр щызэтырагъэпсыхьэх, псэупIэ-коммунальнэ хъызмэтымкIэ ыкIи нэмыкI лъэныкъохэмкIэ проектхэр тэ­гъэцакIэх» — къаритхагъ АР-м и ЛIышъхьэу КъумпIыл Мурат ихъытыу нэкIубгъохэм.