ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм зэрагъэунэфыгъэмкIэ къэралыгъо бюджет учреж­дениеу «Мыекъопэ телеви­дением» иредактор шъхьаIэ­щтыгъэу Андрей Грунтовым иIэнатIэ къызфигъэфеди, къэлэдэсхэм ащыщ горэ пшъэдэкIыжь зыхьырэ секретарэу ыштагъэ фэдэу тхылъ нэпцIхэр ыгъэпсыгъэх.

IофшIэпIэ чIыпIэр нэпцIэу зэритыгъэм лэжьапкIэр мафэм сыхьати 8-м телъытагъэу факIощтыгъ, сомэ мин 527-м ехъу пстэумкIи ратыгъ, ау учреждением къычIахьэ­щтыгъэп, ипшъэрылъхэр ыгъэцакIэщтыгъэхэп. Ащ иIофшIэн, редактор шъхьа­Iэм пшъэрылъ афишIыгъэу, телевидением щылажьэхэрэм атегъэогъагъ.
Урысыем СледствиехэмкIэ и Комитет следст­виехэмкIэ и ГъэIорышIапIэу АР-м щыIэм уголов-
нэ Iоф къызэIуихи, Уголовнэ кодексым ия 285-рэ статья иапэрэ Iахь диштэу зэхэфынхэр кIуагъэх.
Мыекъопэ къэлэ хьыкумым А. А. Грунтовыр мы­сэу ылъытагъ, илъэси 3-м къыкIоцI къэралыгъо къулыкъум хэбзэ лIыкIо IэнатIэ щихьын, зэхэщэкIо, унэшъошIын ыкIи административнэ-хъызмэтшIэкIо пшъэрылъхэр ыгъэцэкIэнхэ фимытэу тырилъхьагъ. Джащ фэдэу А. А. Грунтовым сомэ мин 527-рэ къэралыгъо бюджет учреждениеу «Мыекъопэ телевидением» ритыжьын фае.
АР-м и Апшъэрэ хьыкум Iофым зыхэплъэжьым, Мыекъопэ къэлэ хьыкумым рихъухьагъэм дыригъэштагъ. Унашъом кIуачIэ иIэ хъугъэ.
ЩынэгъончъэнымкIэ Федеральнэ къулыкъум АР-мкIэ
и ГъэIорышIапIэ ипресс-къулыкъу