Адыгэ къуаем ифестивалэу Дахъо гъэхъунэм щыкIощтым хэлэжьэщтхэмрэ ихьакIэхэмрэ амал яIэщт Iоныгъом и 13-м сыхьатыр 10-м къыщегъэжьагъэу 2-м нэс янэIуасэ­хэмрэ ягупсэхэмрэ почтэ открыткэхэр ыпкIэ хэмылъэу аIэкIагъэхьанэу.

Хэгъэгу зэошхом ТекIоныгъэр къызщыдахыгъэр илъэс 80 зэрэхъугъэм итамыгъэ зытет открыткэхэм истребителэу Миг-23 МЛД-м исурэт ате­шIыхьагъ.
Почтэм иIофышIэхэр открыткэм тыратхэщтымкIэ IэпыIэгъу къафэхъущтых, ящыкIэгъэ индекс-
ри къараIощт. «ШIоу щыIэр зэкIэ къыжъудэхъунэу Адыгэ Республикэм щы­шъуфэлъаIох» зыфиIорэ гущыIэхэр зытет штемпелыр открыткэхэм атыра­дзэщт.
«Ягупсэхэу, янэIуасэхэу нэмыкI къалэхэм ащыIэхэм фестивалым къикIырэ открыткэр ыпкIэ хэмы­лъэу аIэкIагъэхьанэу Урысыем и Почтэ амал арегъэгъоты, шъолъыр Iофтхьабзэ­хэм ренэу тигуапэу тахэлажьэ. Фестивалыр зылъэ­гъугъэхэр язэхашIэхэмкIэ нэмыкIхэм адэгощэнхэм ар зэрэфэIорышIэщтым, мэфэкI шIагъом икъэбар шъолъыр зэфэшъхьафхэм ащыпсэухэрэм зэралъигъэ­Iэсыщтым сицыхьэ телъ», — къыIуагъ федеральнэ почтэ зэпхыныгъэм Адыгэ Республи­кэмкIэ и ГъэIорышIапIэ ипащэу Наталья Алифиренкэм.