Мотоциклэхэр ыкIи мопед цIыкIухэр зезыфэрэ кIэлэ ныбжьыкIэхэр гъогухэм къатехъухьэрэ хъугъэ-шIагъэхэм бэрэ зэрахафэхэрэм ыпкъ къикIэу гъогурыкIоныр щынэгъончъэнымкIэ Къэралыгъо автоинспекцием и ГъэIоры­шIа­пIэрэ зыныбжь илъэс 18 имыкъугъэхэм Iоф адэзышIэрэ полицием икъулыкъурэ зэгъусэхэу пэшIорыгъэшъ Iоф­тхьа­бзэхэр зэхащагъэх.

Нэужым хэбзэухъумакIохэр ны-тыхэм аIукIагъэх, гущыIэгъу афэхъугъэх.
Ащ хэлэжьагъ Адыгэ Республикэм хэгъэгу кIоцI IофхэмкIэ и Министерствэ и Общественнэ совет хэтэу, илъэс 40-м къехъугъэу гурыт еджапIэм Iоф щызышIэрэ Александр Девтеровыр.
УплъэкIунхэм къахиубытагъэх кIэлэ ныбжьыкIэхэу мотоциклэхэмрэ мопедхэмрэ зыгъэIорышIэхэрэр. Щынэгъон­чъэным ренэу анаIэ тырагъэтынэу, гъо­гурыкIоным ишапхъэхэр амыукъонхэу ыкIи агъэцэкIэнхэу ахэм зафагъэзагъ.
Илъэсэу тызыхэтым республикэм икъэлэ шъхьаIэ игъогухэм къатехъухьэгъэ хъугъэ-шIагъэхэм мототранспортыр зыгъэIорышIэщтыгъэ зы кIэлэ ныбжьыкIэ ахэкIодагъ, нэбгыритIумэ шъобж хьылъэхэр атещагъэхэ хъугъэ.
ПэшIорыгъэшъ Iофтхьабзэхэм къады­хэлъытагъэу, гъогу-патруль къулыкъум иIофышIэхэм мотоциклэхэм атесыгъэхэм ыкIи ахэм янэ-ятэхэм пшъэдэкIыжь арагъэхьыгъ, ахэм алъэныкъокIэ административнэ протокол 50 фэдиз зэхагъэуцуагъ.
Полицием иIофышIэхэм къызэрэхагъэ­щыгъэмкIэ, мыщ фэдэ хъугъэ-шIагъэхэм лъапсэу яIэр мототранспортым игъэIорышIэн кIалэхэр икъу фэдизэу зэрэфэмынэIуасэхэр, лъэшыщэу зэрэзечъэхэрэр ыкIи фитыныгъэ ямыIэу ар зэрэзэрафэрэр ары.
Сакъыныгъэр анахь шъхьаIэу зэрэщытыр зыщышъумгъэгъупш. ЩэрэхъитIу нахь зыкIэмыт транспортыр бгъэIоры­шIэныр псынкIэп.
Мотоциклэм утес хъумэ Iэпкъ-лъэпкъыр къэзыухъумэщт пкъыгъохэр бгъэфедэнхэ фае.
Гукъау нахь мышIэми, ны-тыхэм якIа­лэхэм мотоциклэр е мопедыр къафащэфы хъумэ егупшысэхэрэп ахэм гу­мэкIыгъоу къапыкIын ылъэкIыщтым.
Александр Девтеровым нахьыжъхэм къафиIотагъ мы техникэр тэрэзэу зэрэбгъэIорышIэн плъэкIыщтыр, гъогум ренэу унаIэ тетын ыкIи шапхъэу щыIэхэр дэгъу дэдэу пшIэнхэ зэрэфаер агу къы­гъэкIыжьыгъ.