ТхьамыкIэгъо кIэух зыфэхъугъэ гъогу хъугъэ-шIагъэ Iоныгъом и 8-м пчыдыжьым Тэхъутэмыкъое районым игъогухэм ащыщ къыщыхъугъ.

ХэбзэухъумакIохэм пэшIорыгъэшъэу зэ­рагъэунэфыгъэмкIэ, Краснодар краим щыпсэурэ кIалэу илъэс 25-рэ зыныбжьыр IэкIыб къэралым къыщашIыгъэ автомобилым ируль кIэрысэу ыгъэIорышIэзэ, гъогурыкIоным ишапхъэхэр ыукъохи, ыпэ итэу чъэщтыгъэ электрокушъхьэфачъэм тесыр риутыгъ. Илъэс 60 зыныбжь хъулъфыгъэу поселкэу Ябло­новскэм щыщым шъобж хьылъэу тещагъэ хъугъэхэм апкъ къикIыкIэ а чIыпIэм ыпсэ щыхэкIыгъ.
— Зэфэхьысыжьхэм къызэрагъэлъагъорэмкIэ, транспортыр бэу зыщызекIорэ гъогухэм кушъхьэфачъэм утесэу уащызекIоныр псынкIэп. Арышъ, автомобилыр зезыфэхэрэм адакIоу, ахэр зыгъэIорышIэхэрэми сакъыныгъэ къызхагъэфэн фае, — къыхагъэщы гъогурыкIоныр щынэгъончъэнымкIэ Къэра­лыгъо автоинспекцием иIофышIэхэм.
Мы Iофым епхыгъэу джырэ уахътэ зэхэфынхэр макIо.