Адыгеим ичIыгулэжьхэм бжыхьэ мэфэ фабэхэр къыз­фа­гъэфедэзэ, гъэтхасэхэм яIухыжьын лъагъэкIуатэ.

АР-м мэкъу-мэщымкIэ и Минис­терствэ Iоныгъом и 9-м тызэрэщигъэгъозагъэмкIэ, тыгъэгъэзэ гектар 58354-у халъхьэгъагъэм 29150-рэ хагъэкIыгъ, зым, гурытымкIэ лъытагъэу, центнер 18,5-рэ къеты, тонн 54072-рэ къаугъои­жьыгъ. Мы уахътэм анахьыбэу, ар цент­нер 20,2-рэ, къизыхырэр Мые­къопэ районым ичIыгулэжьхэр ары.
Чылапхъэ ашIынэу пстэумкIи натрыф гектар 15058,6-рэ гъатхэм халъхьэгъагъ. Тэхъутэмыкъое районым ­нэмыкIрэм зэкIэми яхъызмэтшIапIэхэр ащ иIухыжьын фежьагъэх. ГурытымкIэ лъытагъэу, гектарым центнер 32-рэ къырахы.
БылымIус ашIынэу пстэумкIи респуб­ликэм щыхалъхьэгъэгъэ натрыф гектар 2176-м инахьыбэр Iуахыжьыгъах, тонн 39926-рэ къаугъоижьыгъ.
Сое гектар 9717-у мыгъэ тичIыгу­лэжьхэм апхъыгъагъэм щыщэу гектар ­477-р ары Iуахыжьыгъэр, гурытымкIэ лъытагъэу, зы гектарым центнери 9,8-рэ къеты, тонн 468-рэ къаугъоижьыгъ.
ХэтэрыкIхэр гектари 171-м ехъу­щтыгъэх. Ахэм яIухыжьын Джэджэ, Кощ­хьэблэ, Красногвардейскэ ыкIи Мыекъопэ районхэр ары зыщырагъэжьагъэхэр, тонн 415-м ехъу къырахыгъ.
Нашэ, хъырбыдз, къэбжъый зыфэ­пIощт­хэр Джэджэ ыкIи Шэуджэн районхэр ары зыщагъэтIысхьэгъагъэхэр. Зэ­кIэмкIи гектар 16,5-рэ хъущтыгъ. Ахэм яIухыжьыни фежьагъэх.
ХЪУТ Нэфсэт.