ИгъэкIотыгъэ гъэцэкIэжьынхэр щэкIох
Культурэм и Унэу Кощхьаблэ дэтым гъэкIэжьын IофшIэнхэр щэкIох.
Къуаджэм икультурнэ гупчэ ыкIоцIыкIи ыгупэкIи зэтырагъэпсыхьажьы, инженер коммуникациехэр зэблахъух.
Культурэм и Унэ зашIыгъагъэр 1955-рэ илъэсыр ары, ащ архитектурнэ теплъэу иIагъэр къагъэнэжьыным псэолъэшIхэр яшъыпкъэу дэлажьэх. Непэрэ мафэм диштэнэуи хэхъоныгъэшIухэр фашIых. Культурнэ Iофтхьабзэхэр щызэхэщэгъэнхэм, къоджэдэсхэм языгъэпсэфыгъо уахътэ Iэрыфэгъоу, гупсэфэу щагъэкIон алъэкIыным пстэури фэIорышIэщт.
Псэуалъэм къыпэIулъ чIыпIэри зэтырагъэпсыхьэ, остыгъакIэхэр тырагъэуцох. IофшIэнхэр зэшIозыхырэ подрядчикым къызэригъэгугъэхэрэмкIэ, гъэцэкIэжьынхэр игъом аухыщтых. Ащ сомэ миллиони 102,9-рэ пэIухьащт, къэралыгъо программэу «Къуаджэхэм зэдиштэу хэхъоныгъэхэр ягъэшIыгъэныр» зыфиIорэм къыдыхэлъытагъ. 2025-рэ илъэсым шэкIогъу мазэм культурэм и Унэ атыщт. IофшIэнхэр зэрэлъыкIуатэхэрэм район администрацием ипащэ ынаIэ тет.