Акъущ Фатимэ зэлъашIэрэ IэпэIас. Ащ иIэшIагъэхэр фестивальхэм ыкIи къэгъэлъэгъоныбэхэм ахэлэ­жьа­гъэх. Илъэс 20 хъугъэ исэнэхьат фэшъыпкъэу зылажьэрэр. Москва, Ставрополь, Грознэм, Анкара иIофшIагъэхэр къа­щигъэлъэгъуагъэх. Джы Дахъо гъэхъунэр ащ къежэ.

Фатимэ ишъуашэхэр къэгъэлъэгъон инхэм ахэлэжьэнэу хъугъэ. Адыгеир зызэхащагъэр илэси 100 зэхъум Кремлым щыкIогъэ мэфэкI концертышхом ыпэкIэ къэгъэлъэгъон дахэу рагъэкIокIыгъэм, шъолъырым и Мафэу ВДНХ-м щыкIуагъэм шъуашэу, лъэгъупхъэу ахэтыгъ. Культурэм ыкIи спортым яфес­тивальхэу Ставрополь ыкIи Грознэм ащыкIуагъэхэм, Тыркуем щызэхащэ­гъэгъэ зекIо форумым Адыгеим ыцIэкIэ ахэлэжьагъ. «Многоликая Россия» зыфиIорэ Урысые фестивалым ишIухьафтын шъхьаIэ къырихыгъ. Арэу щытми, илъэс 14 хъугъэу зэхащэрэ адыгэ къуа­ем ифестиваль ежь ышъхьэкIэ апэрэ зэрэхэлажьэрэр.
— КъэпIон хъумэ, адыгэ къуаем ифес­тиваль апэрэу сыхэлэжьэщт. Хъулъ­фыгъэ шъуашэу адыгэ цыер, бзылъфыгъэ шъуашэу саер, ащ дышъэидагъэхэр тедэгъэщтых, кIэлэцIыкIу шъуашэхэр фес­тивалым къыщызгъэлъэгъощтых. Лъэшэу сэгумэкIы, ар пшъэдэкIыжь ин — дизайнерхэр, дышъэидэнымкIэ IэпэIасэхэр мымакIэу къызэкIолIэщтхэ фестивалэу Дахъо гъэхъунэм щыкIощтым сыкъыщылъэгъощт, — къыхегъэщы Фатимэ.

Фатимэ дышъэидагъэмкIэ иIэпэIэ­сэныгъэ къызкIэлъырихыгъэр респуб­ликэм иIэпэIэсэ анахь дэгъухэм ащыщэу Гумэ Ларис — непэ ар АР-м ­лъэпкъ IэпэщысэшIынымкIэ и Ассоциацие ипащ.
— Мыщ фэдэ фестиваль инхэр ­лъэпкъ IэшIагъэхэм якъэгъэлъэгъонхэм къагъэ­баи, къагъэкIэракIэ, тишэн-хабзэхэм, ти­культурэ якуугъэ къагъэлъагъо. ­Адыгэ къуаем ифестиваль лъэпкъымкIэ хъу­гъэ-шIэгъэ инэу щыт. Мэхьанэшхо иI, сыда пIомэ хьакIэхэми, зекIохэми ти­лъэпкъ шхыныгъохэр, тикультурэ, ти­шэн-хабзэхэр ятэгъэлъэгъу, ятэгъашIэ. ПшъэдэкIыжь инэу сиIэр зэхэсэшIэ, ау ар гуIэтыпIэ сфэхъу, тарихъ хъугъэ-­шIагъэм щыщ сызэрэхъущтыр, къызгу­рэIо, — къыIуагъ Акъущ Фатимэ.
Гумэ Ларисэ къызэриIуагъэмкIэ, АР-м лъэпкъ IэпэщысэшIынымкIэ и Ассоциацие ыцIэкIэ адыгэ къуаем ифестиваль IэпэIэсэ нэбгырибл хэлэжьэщт. Ахэр: Нэгъуцу Аслъан, Гостэкъо Руслъан, Сет Сафиет, Джарымэкъо Зурет, Хъурэнэ Азэ, Мыгу Рузанэ, ХъокIо Рузанэ, ЛIынэ Заремэ, ежь Гумэ Лариси зэрахэтэу.
Къалэу Мыекъуапэ, Кощхьэблэ, Тэ­хъутэмыкъое районхэм ящагу къэгъэлъэгъопIэ зэIухыгъэхэм ыкIи лъэпкъ культурэм и Гупчэ художественнэ Iэпэщысэхэм ямэкIайхэм ахэм яIофшIагъэ-
хэр къыщагъэлъэгъощтых. Адыгэ шъуа­шэхэр, ахэр зэрагъэдэхэрэ Iэпэщысэхэр, дышъэидагъэхэр, чысэхэр, Iалъ­мэкъхэр, пхъэм хэбзыкIыгъэ Iэмэ-псы­мэхэр, блэ­кIыгъэ лIэшIэгъухэм агъэфе­дэщтыгъэ тIысыпIэр — Лъэпкъ музеим чIэт диваным тешIыкIыгъэ псэуалъэр, Iанэхэр, пхъэкIычхэр, блэкIыгъэ зэманхэм лъэпкъым ыгъэфедэщтыгъэ хьап-щып­хэм атешIыкIыгъэ пкъыгъохэр Iэпэ­Iасэхэм агъэхьазырыгъэх. А зэпстэур фестивалым ихьакIэхэм ыкIи зекIоу шъо­лъырым къихьэхэрэм арагъэлъэ­гъущт, адыгэ культурэм ибаиныгъэ хащэщтых.
Тэу Замир.