Тигастрономическэ мэ­фэкI ­шъхьаIэ — Адыгэ къуаем ­ифестиваль зэ­хащэнкIэ мэфэ заул ны­Iэп къэнэжьыгъэр. Мы зы­гъэпсэфыгъо мэфэ благъэхэм — Iоныгъом и 13-мрэ и 14-мрэ ар тиреспубликэ щыкIощт.

Зызэхащэрэм къыщегъэжьагъэу цIыфхэм якIэсэ Iофтхьабзэхэм фестивалыр ащыщ хъугъэ. Республикэм исхэр, тихэгъэгу, IэкIыб къэралы­гъохэм къарыкIырэ зекIо минипшI пчъагъэ илъэс къэс ащ хэлажьэ.
«ЦIыфхэм ягугъапIэ къэдгъэшъыпкъэжьыным пае программэ гъэшIэгъон ахэм афэдгъэхьазырыгъ. Анахьэу цIыф кIуапIэу щытыщтхэр Адыге­им имуниципалитетхэмрэ Краснодар краим ирайонитIурэ Мыекъопэ районымкIэ Дахъо гъэхъунэм щызэты­ра­гъэпсыхьэгъэ щагухэр ары. Творче­скэ купхэм лъэпкъ нэшанэ зиIэ щагухэм закъыщагъэлъэгъощт, зэнэкъо­къухэр ащызэхащэщтых, лъэпкъ шхы­ныгъохэр къащапагъохыщтых», — къащитхыгъ АР-м и ЛIышъхьэу КъумпIыл Мурат ихъытыу нэкIубгъохэм.
МэфитIурэ кIощт фестивалым ­исценэ шъхьаIэ Адыгеим итворческэ куп, иорэдыIо пэрытхэм, кавказ эстрадэм иартистхэм зыкъыщагъэ­лъэгъощт. КIэлэцIыкIухэмрэ зыныбжь икъугъэхэмрэ зэнэкъокъу зэфэшъхьафхэм, шIухьафтын зэрылъ викторинэхэм ахэлэжьэнхэ алъэкIыщт. ТекIоныгъэр къыдэзыхыхэрэм ти­къу­шъхьэхэм ащыгъэпсыгъэ зекIо комплекс анахь дэгъухэм защагъэпсэфын алъэкIыщт. Джащ фэдэу фестивалым ипрограммэ диштэу спорт зэнэкъокъухэр зэхащэщтых, адыгэхэм якультурэ, ятарихъ нэIуасэ зафа­шIыщт, республикэм имодельерхэм адыгэ шъуашэхэр къагъэлъэгъощтых.
«Iофтхьабзэр зыщыкIощтыр чIыпIэ пэIудзыгъэу зэрэщытым елъытыгъэу ыпкIэ хэмылъэу автобус 12-кIэ цIыф­хэр Мыекъуапэ ращызэ, Дахъо гъэ­хъунэм нагъэсыщтых ыкIи джащ фэдэ къабзэу къыздикIыгъэ чIыпIэми къагъэсыжьыщтых. Унэе транспортымкIэ Iэрыфэгъоу щытыщт гъэуцупIэхэри зэтырагъэпсыхьагъэх. Ар зэрэкIорэр ИнтернетымкIэ занкIэу къаты­жьыщт. ­Адыгэ къуаем ифестиваль шъухэлэжьэнэу шъукъетэгъэблагъэ! Iоныгъом и 13-мрэ и 14-мрэ Дахъо гъэхъунэм шIукIэ тыщызэIуегъакI!» — къыIуагъ Адыге­им и ЛIышъхьэ.