Мыекъопэ къэлэ сымэджэщыр лъэныкъо зэфэшъхьафхэмкIэ Iэзэн-пэ­шIо­рыгъэшъ IофшIэныр зыгъэцэкIэрэ учреждениеу щыт. Мыщ ищагу дэт корпуси 8-мэ отделение зэфэшъхьафхэу ачIэтхэм япшъэрылъхэр дэгъоу агъэцакIэ.

Сымэджэщым епхыгъэх сабыйхэр къызыщыхъухэрэ унэр ыкIи лабораториер. Джащ фэ-
дэу медицинэ колледжым ыкIи Мыекъопэ къэралыгъо техно­логическэ университетым аще­джэхэрэм мыщ практикэ щахьын ыкIи къыIунэжьынхэ амал яI. Лъэпкъ проектхэр, къэра­лыгъо программэхэр къызфагъэфедэхэзэ, сымэджэщыр зэрэзэтырагъэпсыхьэрэр, пшъэрылъэу зыфагъэуцужьыхэрэр «Адыгэ макъэм» къыфиIотагъ IэзапIэм иврач шъхьаIэу Владимир Лобода.
Паллиативнэ
IэпыIэгъур
Адыгеим псауныгъэр къэу­хъумэгъэнымкIэ исистемэ хэ­хъоныгъэшIухэр ышIынхэм лъэ­шэу ынаIэ тырегъэты АР-м и ЛIышъхьэу КъумпIыл Мурат.
— Къэлэ сымэджэщым иIоф­шIэн зэхэщэгъэнымкIэ, зэте­гъэпсыхьэгъэнымкIэ лъэпкъ проектхэр къызфэтэгъэфедэх. А пшъэрылъыр ти ЛIышъхьэ къытфегъэуцу ыкIи амал зэриIэкIэ зэрэпхырытщыщтым тыпылъ. ИкIыгъэ илъэсыр пштэ­мэ, проектэу «ГъэшIэ кIыхьэр ыкIи чаныр» зыфиIорэм иамалкIэ паллиативнэ IэпыIэгъум зедгъэушъомбгъун, джащ фэдэу отделениер оборудованиякIэкIэ зэтедгъэпсыхьан тлъэ­кIыгъ. Мыр анахьэу зытегъэ­псыхьагъэр сымэджэ щылъхэу ежь-ежьырэу зызIыгъыжьын зы­мэлъэкIыхэрэр ары. Ахэм яуз псынкIэ къафэхъуным тегъэпсыхьагъ, — хигъэунэфыкIыгъ Владимир Лобода.

Врач шъхьаIэм къызэриIуагъэмкIэ, паллиативнэ IэпыIэ­гъум иотделение хэушъхьафыкIыгъэ пIэкIорхэр, ахэм ары­лъыщт ошэкур гъэнэфагъэхэр, ИВЛ-р, кислороднэ концент­раторхэр икъоу чIагъэуцуагъэх. Къалэм дэс сымаджэхэу яунэхэм ащаIыгъхэм ягу­псэхэу закъыфэзыгъазэхэрэм ящыкIагъэу къызкIэлъэIухэрэр аратых. Джащ фэдэу гъэрекIо къыщегъэжьагъэу бригадэ зэхащагъэу автомобиль япхыгъэу мафэм дэкIыгъуи 5-м нэс ышIэу къыхэкIы.
— Сымаджэр сэкъатныгъэ иIэу е уз гъэнэфагъэм къыхэкIэу щылъ зэрэхъугъэр къэзыушы­хьатырэ тхьапэр иIэ зыхъукIэ тишIуагъэ етэгъэкIы. Паллиативнэ IэпыIэгъум лъэшэу къыкIэупчIэх ыкIи ар къызфагъэфедэ. ИкIыгъэ илъэсыр пштэмэ, тибригадэ дэкIыгъо 512-рэ ышIын фэягъэмэ, иIагъэр 760-рэ. Мы илъэсми а пчъагъэм къы­щыкIэрэп, Iоныгъом ехъулIэу дэкIыгъо 444-рэ ышIыгъах, — къыхигъэщыгъ къэлэ сымэ­джэщым иврач шъхьаIэ.
Реабилитациер
Мыекъопэ къэлэ сымэджэщым медицинэ реабилитациемкIэ иотделение анахьэу къызкIэупчIэхэрэм ащыщ, сымэджабэ къеуалIэ, япсауныгъэ зыпкъ щырагъэуцожьы. Ащ пае мыр джырэ лъэхъаным диштэу зэтегъэпсыхьагъэным мэхьанэшхо иI.
— Лъэпкъ проектэу «Псауныгъ» зыфиIорэм къыдыхэлъытагъэу, сомэ миллион 47-м ехъу къытфатIупщи, реабилитаци­емкIэ отделениер оборудованиякIэкIэ зэтедгъэпсыхьагъ. Трена­­жер зэфэшъхьафхэр, Iэпкъ-лъэп­къыр зэкIагъэкIыным фытегъэ­псыхьэгъэ хэушъхьафыкIыгъэ пкъыгъохэр чIэдгъэуцуагъэх. Ахэм ямызакъоу, джы а от­делением шъом пхырыкIызэ тхыкIуцIым Iоф езыгъэшIэщт аппарат иIэ хъугъэ, — къы­Iуагъ Владимир Лобода.

РеабилитациемкIэ отделе­нием еолIэрэ сымаджэ пэпчъ иуз елъытыгъэу зэреIэзэщтхэ программэр къыфыхахы, ащ тетэу зыпкъ рагъэуцожьы. 2024-рэ илъэсым мыщ нэбгырэ мин фэдизмэ щяIэзагъэх.
ЭКО-р
Демографием ылъэныкъокIэ Iофхэм язытет нахьышIу шIыгъэным республикэм ипащэхэм анаIэ тет, мэхьанэшхо раты. Ащ къыдыхэлъытагъэу Адыгеим къихъухьэхэрэ сабыйхэм япчъа­гъэ нахьыбэ хъуным фэIорышIэ ЭКО-р. Мы шIыкIэр нахь къыз­фэзгъэфедэхэрэр сабый зыхэмыкIырэ бзылъфыгъэхэр ары.
ШIокI зимыIэ медицинэ страхованием иполискIэ шIоигъоныгъэ зиIэ бзылъфыгъэхэм ЭКО-р ашIыныр нахь Iэрыфэгъу хъугъэ.
— Мы шIыкIэмкIэ бзылъфыгъэм сабый къыфэхъуным ахъщэшхо текIуадэ. Илъэс пчъа­гъэхэм къакIоцI ыпкIэ хэмы­лъэу къэралыгъом ЭКО-р афишIыщтыгъэми, ащ изыфэгъэхьазырынкIэ уплъэкIунхэм мылъку­шхо апэIухьэщтыгъ. Лъэпкъ проектэу «Унагъор» зыфиIорэм къыды­хэлъытагъэу 2025-рэ илъэсым сомэ миллион 15 къытфатIупщыгъ ЭКО-м бзылъфыгъэхэр фэдгъэхьазырынхэм пае. Мыщ къыхеубытэх мэхьанэ зиIэ игъэ­кIотыгъэ уплъэкIунхэр, — хи­гъэунэфыкIыгъ В. Лобода.
Непэ ехъулIэу бзылъфыгъэ нэбгыри 133-рэ ЭКО-р афа­шIынэу агъэкIогъах, процедурэ 92-рэ ашIыгъ, лъэрмыхьэ хъугъэр — 17.
Перинатальнэ гупчэр
Псауныгъэм икъэухъумэнкIэ, демографием ылъэныкъокIэ Iофхэм язытет нахьышIу шIыгъэнымкIэ перинатальнэ гупчэм мэхьанэшхо зэриIэр гъэнэфагъэ. Мыщ зэпымыоу гъэцэкIэ­жьынхэр рашIылIэх, оборудованиякIэ чIагъэуцо. Шъугу къэдгъэ­кIыжьын, илъэситфыкIэ узэ­кIэ­Iэбэжьмэ, программэу «Псау­ныгъэр къэухъумэгъэныр» зыфиIорэм ыкIи республикэ бюджетым яамалкIэ сомэ миллион 215-рэ фэдиз зытефэгъэ обо­ру­дованиякIэ гупчэм къыфа­щэ­фыгъ, сабыйхэр къызыщыхъурэм зэ­хъокIыныгъэшхохэр фашIы­гъэх: ар зычIэт унэм я 5-рэ къат тырашIыхьагъ, унэ пчъагъэ къыпашIыхьагъ. Квадрат метрэ 1121-кIэ ащ зиушъомбгъугъ. Сабый къэхъугъакIэхэм реанимациемкIэ ыкIи терапиемкIэ яотделение, пэсащэу къэхъурэ кIэлэцIыкIухэу дагъо зиIэхэм яотделение щыIэхэ хъугъэ. Ахэм анэмыкIэу перинатальнэ гупчэм приемнэ отделение къыпашIы­хьагъ, сабый къызыфэхъугъэхэм защыфэгушIощтхэ чIыпIэ шъхьафи агъэнэфагъ, нэмыкIхэри.
— Лъэпкъ проектэу «Уна­гъом» къыдыхэлъытагъэу мы илъэсым сомэ миллиони 176-рэ фэдиз къытфатIупщыгъ. Мыр ахъщэшху, ащ елъытыгъэу шэпхъакIэхэм адиштэу перина­тальнэ гупчэр, пэсащэу къэ­хъурэ сабыйхэр зыщаIыгъхэрэ реанимациер зэтедгъэпсыхьанхэм тафежьагъ, — къыIуагъ врач шъхьаIэм.
Къэлэ сымэджэщэу изытет игугъу къышIызэ, зэкIэ отде­лениехэм ящыкIэгъэ гъэцэ­кIэ­жьын къызэрыкIохэр зэрара­шIылIагъэхэр, мебелыжъ зычIэт зэрахэмытыр, программэу «Iэрыфэгъу щыIакIэр» зыфи­Iорэм диштэу сэкъатныгъэ зиIэ сымаджэхэр ащызекIошъунхэм зэрэтегъэпсыхьагъэхэр В. Лобода къыIуагъ.
IофышIэхэр
НепэкIэ шъолъырхэр медицинэ IофышIэхэм зэращыкIэ­хэрэр хэткIи шъэфэп. А лъэныкъомкIэ къэлэ сымэджэщым иIофхэм язытет тыкIэупчIагъ.
— Шъыпкъэ, тыдэкIи фэдэу тэри фэныкъуагъэхэр тиIэх. Врачхэм ягугъу къэсшIымэ, анахьэу тищыкIагъэхэр неонатологхэр, анестезиолог-реаниматологхэр ары, джащ фэдэу узистхэм, кардиологхэм тащэкIэ. ПчъагъэхэмкIэ къэпIон хъу­мэ — врачи 8. Гурыт медицинэ IофышIэхэр ары анахьэу тыз­фэныкъохэр, нэбгырэ 67-рэ тищыкIагъ, анахьэу палатэм итэу Iоф зышIэрэ сестрахэр. Къыхэзгъэщымэ сшIоигъу, мыщ Iоф щызышIэрэ медицинэ сестра 39-рэ мы уахътэ сабый къа­фэхъугъэу зэрэщысхэр. Медицинэ колледжыр къэзыухыгъэхэр агощыхэ зыхъукIэ ащыщ-
хэр къытфагъакIохэу, декретым щысхэри къыдэкIыжьыхэмэ, ишIуагъэ къэкIощт. Младшэ ме­дицинэ IофышIэхэмкIэ тиIоф дэеп, екъух, — хигъэунэфыкIыгъ Владимир Лобода.
ГухэлъыкIэхэр
— Медицинэр зы чIыпIэ итэп, ащ хэхъоныгъэу ышIырэм елъытыгъэу, тимыIэ Iэмэ-­псымэхэр зэдгъэгъотынхэмкIэ гумэкIыгъо щыIэп. АР-м и ЛIы­шъхьэу КъумпIыл Мурати, къэралыгъо хэбзэ къулыкъухэми анаIэ къыттет. Анахьэу джы тызажэрэр хирургиемкIэ къулы­къур ыкIи приемнэр зычIэтыщтхэ псэолъэшхоу тфашIынэу агъэнэфагъэр ары, — къыIуагъ врач шъхьаIэм.
Iэшъынэ Сусан.