Мыекъопэ къэлэ хьыкумыр УФ-м ошIэ-дэмышIэ IофхэмкIэ и Министерствэ АР-мкIэ игъэIорышIэпIэ ШъхьаIэ ипащэ игуадзэу Антон Сомарскэм иIоф хэплъагъ. Урысыем и Уголовнэ кодекс ия 160-рэ статья ия 3-рэ Iахь, ия 292-рэ статья иапэрэ Iахь къадэлъытэгъэ бзэджэшIагъэхэр зэрихьагъэхэу ар агъэмысагъ.

ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм зэрагъэунэфыгъэмкIэ, ащ иIэнатIэ къызфигъэфедэзэ, щыфэ-гъэстыныпхъэ материалхэм апэIухьэн фэе бюджет ахъщэм щыщ ытыгъугъ.
Мыекъопэ къэлэ хьыкумыр Iофым зыхаплъэм ыуж тазырэу сомэ 100000 ыкIи хэбзэухъумэкIо, къэралыгъо, муниципальнэ къулыкъухэм хэбзэ лIыкIо IофшIэн илъэси 2-рэ мэзихырэм ащигъэцэкIэн фимытэу тырилъхьагъ.
Хьыкумым рихъухьагъэм кIуачIэ иIэ хъугъэ.