Урысыем и Следственнэ комитет иследственнэ гъэIорышIапIэу Адыгеим щыIэм Мыекъопэ районымкIэ иотдел Абдзэхэхьэблэ къоджэ псэупIэм иадминистрацие иотдел ипащэ ылъэныкъокIэ къызэIуихыгъэ уголовнэ Iофым изэхэфын лъегъэкIуатэ. УФ-м и Уголовнэ кодекс ия 292-рэ статья иа 1-рэ Iахь диштэу иIэнатIэ къызфигъэфедэзэ бзэджэшIагъэ зэрэзэрихьагъэмкIэ ар агъэмысэ.

ЩынэгъончъэнымкIэ Федеральнэ къулыкъум и ГъэIорышIапIэу АР-м щыIэм зэхищэгъэ оперативнэ-лъыхъон Iофтхьабзэм изэфэхьысыжь уголовнэ Iофым икъызэIухын къыкIэлъыкIуагъ.
ЗэрагъэунэфыгъэмкIэ, 2024-рэ илъэсым тыгъэ­гъа­­зэм и 6-м администрацием икъулыкъушIэ Урысыем игражданствэ зимыIэм 1992-рэ илъэсым щыублагъэу Мыекъопэ районым зэрэщыпсэурэр зэрытхэгъэ тхьапэр хэбзэнчъэу ритыгъ. Ащ ишIуагъэкIэ къэралыгъом игражданствэ хэбзэнчъэу ащ къыратын ылъэкIы­щтыгъ.
БзэджэшIагъэм лъапсэ фэхъугъэр гъэунэфыгъэным фытегъэпсыхьэгъэ уплъэкIунхэр следовательхэм ыкIи криминалистхэм рагъэкIокIых, ащ дакIоу хьыкум экспертизэхэр агъэнэфагъэх.
ЩынэгъончъэнымкIэ Федеральнэ къулыкъум и ГъэIорышIапIэу АР-м щыIэм
ипресс-къулыкъу.